...................بسم الله الرحمن الرحيم .......................
🔴🔴 🔴 مدونة عتمور الإلكترونية السودانية. 🔴 🔴
سياحة في دار الرباطاب بمحلية أبو حمد بولاية نهر النيل
🔴شاعر الرباطاب الكبير أستاذ الجيل/ السر الماحي 🔴
🔴عتمور- محلية أبو حمد - ولاية نهر النيل - السودان🔴
🔴 أبو حمد حاضرة شعب الرباطاب -ولاية نهر النيل السودان🔴 أخبار - اجتماعيات - مناسبات - و متابعات🔴
🔴السلسلة التوثيقية: الرباطاب في تاريخ السودان.
...................بسم الله الرحمن الرحيم .......................
سياحة في دار الرباطاب بمحلية أبو حمد بولاية نهر النيل
شاعر الرباطاب الكبير أستاذ الجيل/ السر الماحي
السلسلة التوثيقية: الرباطاب في تاريخ السودان.
د. ابراهيم عثمان سعيد عبد الحليم
و حول تاريخ و جغرافية الرباطاب ذكرهم من المؤرخين الأجانب نعوم شقير في كتابه جغرافية و تاريخ السودان:
"و ذكر المؤرخ نعوم شقير الرباطاب، في كتابه جغرافية و تاريخ السودان، ص 63:
فقال عن الرباطاب " أنهم أصحاب ككر و طاقية ".
و ذكر أيضا عن الرباطاب ص 426: " أنهم ملوك"،
تمتد مملكتهم من وادي السنقير إلى الشامخية فيما وراء أبي حمد.".
و إداريا سابقا تتكون محافظة أبو حمد من سبع عموديات، و إجمالي شياخات هذه العموديات 41 شياخة/ مشيخة، فهذه مكونات نظارة الرباطاب التاريخية.
فعموديات الرباطاب السبع ( إداريا سابقا) تنقسم كل عمودية منها إلى عدد من المشيخات/الشياخات على النحو الآتي :
1-عمودية الباقير : عدد الشياخات سبعة عمدتها عثمان سليمان أبوحجل خلفه إبنه سلمان عثمان و عين شيخ خط لمنطقة الرباطاب
2-عمودية الكدق : عدد الشياخات سبعة عمدتها مصطفي سليمان أبوحجل خلفه إبنه الطيب مصطفي
3-عمودية أبوهشيم : عدد الشياخات سبعة عمدتها مفضل الحسين ، خلفه إبنه حسين مفضل
4-عمودية عتمور : عدد الشياخات إثنين (شياخة عتمور و شياخة امكي) عمدتها محمد بيناوي الحاج
5-عمودية كرقس : عدد الشياخات ثلاثة عمدتها : الشيخ الملاوي
6-عمودية الزويرة عدد الشياخات ثلاثة عمدتها : علي حاج رحمة حاج بشير ،خلفه المصطفي محمد أشول، خلفه حفيده محمد المحجوب، خلفه شقيقه مصطفي المحجوب
7-عمودية مقرات : عدد الشياخات 12 شياخة أربعة شياخات بالضفة الغربية ، ست شياخات داخل مقرات ، شياختان بالضفة الشرقية و هي أكبر العموديات من حيث المساحة وعدد السكان.
عمدتها : عمر البشير رحمة بطران
خلفه : الملك فرح
خلفه : عمر البشير للمرة الثانية
خلفه إبنه علي عمر البشير
(ينظر : الإدارة الأهلية في منطقة الرباطاب - الموقع الإلكتروني منتديات وطني السودان).
فمكونات العناصر السكانية لمنطقة شعب الرباطاب و مجتمعاتها المتجانسة عبارة عن نموذج لسودان مصغر، تجتمع و تتعايش فيه كل الاجناس و باعداد كبيرة من مكونات عناصر القبائل السودانية و غيرها .
و نسيج مكونات مجتمع منطقة شعب الرباطاب معروف على نطاق السودان عامة بالتسامح و المحبة و الإخاء و طيب المعشر، و قبول الآخر دون النظر إلى أي جهوية أو قبلية، و بدون كراهية و عنف و عصبية و بدون جنوح للفوضى و التمرد و العصيان، فمدينة أبوحمد حاضرة الرباطاب الآن تمثل نموذجاً للتعايش السلمي و المجتمعي في السودان.
فأفضل من كتبوا و وثقوا لتاريخ الرباطاب و أدبهم الشعبي و أنسابهم من خلال البحوث و الكتابات و الدراسات البحثية المنهجية المتخصصة، فمعظمهم من خارج المنطقة و منهم على سبيل المثال :
في تاريخ و جغرافية الرباطاب من المؤرخين الأجانب نعوم شقير في كتابه جغرافية و تاريخ السودان و عدد آخر من المؤرخين الأجانب بوركهارت و ماكمايكل و هنري سيسيل جاكسون H. C. Jackson و جون ونتر كروفوت و F. C. S. Lorime ...و غيرهم .
و أفضل من كتب عن أدب الرباطاب الشعبي البروف عبد الله علي ابراهيم (كتاب: من أدب الرباطاب الشعبي1966م) . و أفضل من كتب عن (أنساب القبائل السودانية و من ضمنها قبيلة الرباطاب البروف عون الشريف قاسم). إضافة إلى كتابات آخرين من خارج المنطقة .
و هذه سياحة شعرية في ديار الرباطاب - قرى و أرياف و أماكن شرق و غرب و جزائر و وصف و ذكر لصفات و مآثر و مناقب أهل الديار - و شعب الرباطاب موطنهم الأصلي بمحلية أبو حمد بولاية نهر النيل بالاقليم الشمالي بالسودان.
و لأهمية و ضرورة التوثيق و التعريف بمنطقة الرباطاب بالسودان نذكر أسماء مجموعة من القرى و الأماكن و الجزر في ديار الرباطاب بالسودان كما وردت في قصيدة الأستاذ الشاعر السر الماحي من السنقير جنوب المنطقة و إلى مدينة أبو حمد حاضرة الرباطاب و من دقش شمالا إلي الكربة جنوباً كالآتي:
السنقير -العقبة -زمامة- الزويرة -عبادي- سبنس- التكولي- ام سرح -قنديسي -الباقير -الكبانة- اراك الخير- سرنات- التنسو - ام حجير -كجرات -الغريب- الكودق- سام التوم -اب سول- الحويراب -الترعة -ام مردي- الجريف- امكي- العتمور- العبيداب -كرقس -حجر المك- أمن- القرشاب- اب سلم- ام مريخ -الزويرة- ام ضحيان- مقرات- الكرو- غريب مقرات- اولاد ضيف الله غرب الضيفلاب- كديته- الطوينة -الشلال- السلتيب -الشامخية- العال -العشكوت- العسلية- اب طين- الغابة- الفداء- اب حمد.
دقش - الكوع- قلقتي- المزارع- الغويبة- الهيالة- الجزيرة -ام غدي -بسوي -مري -اب هشيم- مرو - ارتل- انجري -شريق دبكة- الطرفاية- ام ندي- اب سلم- الكربة.
و لقلة المراجع و المصادر التاريخية حول هذه المنطقة تعتبر هذه القصيدة كمصدر و مرجعية مهمة للباحثين؛ للتعريف بمنطقة الرباطاب بالسودان - الإنسان و المكان - كما وردت في تراث و أدب الرباطاب الشعبي بالسودان لشاعر الرباطاب الكبير و أستاذ الجيل/ تاج السر الماحي الطاهر من أبناء سبنس الباقير بدار الرباطاب بالسودان. و أدناه ابيات القصيدة:
*♦️*الرباطاب
ديل العزهم فوق الخلق مترامى
ديل مصدر قصيدى و شعرى هم الهامى
ديل عشقى السكن جواى قديم و غرامى
ديل فى كل محفل صورتن قدامى
ديل اهلى المتل عقد الجواهر الاصلى
ديل سندى و قفاى عزى و جوابى و فصلى
فوق نيران هواهم من صغِير مصلى
ديل ارحام و ديل حبل الموده و وصلى
من يوم ما وعيت و عرفت درب الهم
لقيت ريدكم ملك اعضايا و اصبح دم
انظم يا لسان جر القصيد و النم
فوق دار ود رباط بالحله جت من جم
الليله اللبيب حالف قراكى يسوقه
و الحب و السماح ينزل يعمر سوقه
مكتول من زمان همت و صبحت عشوقه
و غارت فى حشاى ضربت جوايا عروقه
*♦️ *السنقير موكر فى قلوبنا مقيم
جودو و خيرو وافر ديمه نفعو عميم
فيه رجال تقابلك هاشه ساعة الليم
و الواحد يتب عجلان و ديمه هميم
*♦️ *العقبه الصبر و الفرسه باقى اساسه
و فى اليوم الكريه معروفه شدة باسه
كضاب البقول حدد حدوده و قاسه
نستعزى و نبشر نحن فوق فراسه
*♦️ *زمامه من المحاسن جمله ماخده نصيبه
زمامه الضكره تب ماخداها كلها نيبه
زمامه النور جلال عشقا قديم و حبيبه
زمامه رجال رتوت حتى الثريا تجيبه
*♦️ *انزل يالبيب فوق الزويره و زوره
تلقى الناس تقابلك و الوجوه مسروره
من وكتا" قديم متحشمه و مستوره
ابدا مابتقابلك نافره يوم و نكوره
*♦️ *احذر يالبيب و اوعك تفوت عبادى
فيها رجال اسود حارسا الدرب و الوادى
فيها جنس كرم والله قط مو عادى
ظاهر فى الوجوه باين عليهم و بادى
*♦️ *سبنس للصَلاح و التقوى مسكن و باب
سبنس للمكارم و الحكم اسباب
سبنس دوحة وارفه و للصلح وجاب
سبنس كل زول من ناسا قولو صواب
*♦️ *من عند التكولى و لى ام سرح فد جره
فيها رجال تلوب فوق السهول منشره
مرين فى الكماج ساعة الحبس و الزره
وجودن فات و طوفن ضمه طامح بره
*♦️ *قنديسى الحنينه الطيبه دانيه قطوفه
تجود من غير حساب بين البلاد موصوفه
انزل ياللبيب سوح فى رحابه و طوفه
تلقى رجال موسمه للدواس مكلوفه
*♦️ *الباقير شموخ و عزا قديم ملموس
الباقير محصن و بالاسود محروس
الباقير علم ماهو الخفى و مدسوس
الباقير فضائل و مكرمات متروس
*♦️ *الكبانه غرفوا من المكارم و عبوا
الكبانه من ضرع السماحه اتربوا
الكبانه ساعة الحاره جت يتكبوا
الكبانه ريحا" عاصفه عاد كان هبو
*♦️ *اراك الخير حبيبه و فى القرار ست شور
عندها فى المحافل ديمه همه و دور
فيها سيوف تجز الهامه تاخد القور
و فيها رجال جزم للضيف تعقر التور
*♦️ *احذر من تفوت تتعدى ناس الزومه
ديل عدل الفضائل عندهم متمومه
كضاب البقول يوم بالغلط مليومه
فيها ايادى صادقه بتنصر المظلومه
*♦️ *ادخل فى الجزائر و ابدا بى سرنات
شيخنا احمد محمد و بركة الدعوات
مر بالتنسو روح من ام حجير كجرات
تلقى كرم ضيافه و طيبه مابتتفات
*♦️ *كان قلنا الغريب اياهو سيد الشكره
فيهو رجال تلوب ليهم مجالس وحكره
الواحد يهوش بالضيف و تاخده السكره
مابيضبح سخيل ينحر يجود بالبكره
*♦️ *الكودق رجالا كلهم اخيار
الكودق يمين سيف النصر بتار
الكودق عزيمه و عزه جاه و وقار
الكودق مراجل فى الشدايد ونار
*♦️ *سام التوم هناك و اب سول عليهم مر
تلقى هناك رجال مسميه حاله يسر
تارسين المخازن بالتمر و البر
باذلين الموده و مابيعرفو المر
*♦️ *انزل فى الحويراب تلقى واجب الضيفه
و كرما بى بشاشه كمان معاه حليفه
تامين الرجاله مكملين تصنيفه
حاتم طى زمان سووله تانى خليفه
*♦️ *عجل يالبيب لازم تقوم بى سرعه
تغشى الناس هناك تنزل تزور الترعه
الحظ غير شك و اتاها ماخده القرعه
لى صيد المكارم باقيا شركه و شرعه
*♦️ *ام مردى العطوفه و حانيه ماها شحيحه
فيها مساحه واسعه من الرجاله فسيحه
فى دار ود شبكنا القعده سمحه مريحه
و جودا اشد من مطر الضحى ام تلقيحه
*♦️ *معروفه الجريف بين المناطق قامه
و فيها الجود مطوفن و للمكارم هامه
فى خد دار رباط زينه ومنوره شامه
لازم من نحيى رموزه ديك و اعلامه
*♦️ *امكى الجبره والعز و الجلال و الهيبه
امكى رجال اشاوس والمعادن طيبه
امكى سدانه البيت الكبير بنى شيبه
امكى ان شاء الله سالمه و ديمه عامره و طيبه
*♦️ *العتمور موشحه بالنواصى الغر
العتمور جواهر و فيها صافى الدر
العتمور كرم معدن ماصل حر
العتمور سند ساعة الليالى تزر
*♦️ *عبيداب غير شك مافيهم المزغول
عبيداب للحديث المسمى و المدلول
عبيداب عزه مهما اقول عليهم اقول
عبيداب شامخه فوق الناس مكانه و طول
*♦️ *كرقس من قديم مالكه السياده و هيله
كرقس دوحه وارفه ظلاله مافى مثيله
كرقس مكمن الخير بى ترابه و نيله
كرقس هيا قوم ياصاحبى عاد نمشيله
*♦️ *حجر المك فوارس مافى ليها رفيق
حجر المك بحر .. فى الجود و ميزه غريق
حجر المك رجالا تلفى ساعة الضيق
و دايما فى الشدايد زاد و فكة ريق
*♦️ *فى امن الامان سعد النفوس و الراحه
و للخير كل زول ساعيلو كم طراحه
مهما اقول كلام و افرد له منى مساحه
هم فايتنو اكتر و فوقه زادوا فلاحه
*♦️ *تعالو جميع نحيى اهلنا فى القرشاب
صوتن عالى يهدر و بالخلوق رحاب
مهما اقول كلام بلقاه فيهم اصاب
سمحين الصفاة طيبه و كرم انساب
*♦️ *امشى على اب سلم واغشاها حيى رجاله
من قولة سلام حالا يتبوا عجاله
يفرحوا بيك يهوشوا وتعتريهم حاله
و كان قلنا الفراسه ركوز يحاكو جباله
*♦️ * كيف بنسى ام مريخ و اهل الفضل و الجود
ديل ناس المفاخر و العطاء الممدود
ديل قبلة عشمنا و كت نتوق و ننود
مدخورين يحلو و يرقعوا المقدود
*♦️ * ايدك يالزويره على المكارم حاقت
فيك الناس تبايع و الكفوف اتلاقت
دارك واسعه ابدا بالضيوف ماضاقت
و كل الناس تحن هيمانه ليك اشتاقت
*♦️ *التلب اللزوم المصطفى المحجوب
فى سفر العظام بالنور سطع مكتوب
جودو عجاجه شايل ديمه رِيِحو هبوب
و ام ضحيان ركيزه بتسند المغلوب
*♦️*مقرات نعمه من نعم الكريم موهوبه
مقرات نار كرامه من الجدود مشبوبه
مقرات خيمه للكرم الاصيل منصوبه
مقرات سيره طيبه الناس بيتحكوبه
*♦️ *الكرو للضعيف تايه و لقيمه وايد
الكرو كيله وافر و ديمه فوقه تزيد
الكرو للجميع بهجه و مسره و عيد
الكرو دار علم للصالحين و مسيد
*♦️ *غريب مقرات محصن و بالفضيله اتربا
شربان المكارم و انترس و اتعبا
ليه الحق يفاخر و كل زول يتنبا
فوق مجدا تليد قام اتربط فوق صبه
*♦️ *ولاد ضيف الله فى غرب الجزيره عيون
ولاد ضيف الله ديل سيف الدواس مسنون
ولاد ضيف الله در صافى و نقى و مكنون
ولاد ضيف الله قدرها بالدهب موزون
*♦️ *كديته من المكارم ماخده حظها وافى
و ليها سلام مربع و فوقه كم عوافى
كديته اصاله مو مغشوشه دمها صافى
ايدا تطول تسند الجاى طافش و لافى
*♦️ *انزل فى الطوينه العامره بالصلاح
ديل اهل العلوم والتقوى والاصلاح
ديل نار الكرم موقوده للبياح
ديل ناس ودقلوبه العلمه مو رحراح
*♦️ *انزل يالبيب و اتوجه الشلال
امانا جنس شهامه وامانا تلقى رجال
دارعين الكرم لابسنو جبه و شال
و محموده الخصال متبوعه بالافعال
*♦️ *اعبر النيل غرب و اتوجه السلتيب
تلقى وقار و هيبه و ناس مقاشره العيب
ما بلوكو الكلام و يكترو القِلِيب
راكبين الخيول للحاره و الجقليب
*♦️ *برضك امش شمال و اتوجه الشامخيه
تلقى الزول تقيل ميزانه يعدل ميه
فقرا و ناس صلاح يحجوا و يسدو الديه
و بين الناس مشكره سيرتن مطرِيه
*♦️ *العال للمكارم من قديم انحازت
العال خزنه حاوياها الفضايل و حازت
فيها رجال هميمه و شيكه يوم ما رازت
و فى كل المحافل و السباقات فازت
*♦️ *العشكوت خصوصا ليها منى اشاده
فى الجود و الكرم ما شفنا ليها نداده
عند ساعة الضيوف يجرى و يزيد عداده
فى يوم اللطام للناس رسانه و قاده
*♦️ *العسليه فى سافلنا باقيه مزاره
و ربنا من نعيمه يزيده يمحى اوزاره
ديل اولاد عمر سند الصفوف و كباره
ديل ركازه للسودان عموم و حباره
*♦️ *قبل تانى شرِق ياخي روح اب طين
تلقى عزاز اكارم اهل امانه و دين
يقابلو الضيف يبشروا فوقه بالسكين
قبل مايتم سلامه عليه يرمو يمين
*♦️ *جد السير جنوب يا خِلى روح الغابه
تلقى رجال هناك غرسوا المكارم غابه
سمحين الصفاة لابسين جلال و مهابه
تخلى الزول يفاخر الناس و يتفاشابه
*♦️*سلام ناس الفداء الشامخين عيال منصور
شكركم عندى وافر مابتشيلو سطور
زولكم فى الشدايد من قديم مشكور
و ايدكم وافره ديمه تجبر المكسور
*♦️ *إسمك ي أب حمد فوق راسنا نلبسه عمه
ما انتى القياده و مركزك فى القمه
مابتتوانى يوم الحاره عندك همه
فيك رجال يمين الواحد ايدو مسمه
التاج المرصع بالجواهر هيلك
و انتى اياكى ساسنا و راسنا الله و كيلك
قبلتنا وحرمنا نشد رحالنا نجيلك
واجبنا احترامك و كل رواد جيلك
*♦️ *دقش الجود سكن جوه البيوت اتحكر
دقش الناس اصال مافيهم البتنكر
دقش ارثا" قديم من الموده مسكر
دقش للناس تصافى وكت تهيج تتعكر
*♦️ *ميل يالبيب طوالى روح الكوع
ديل اهل الجناين و التمر مزروع
ديل قوت الرجال ايام مواسم الجوع
و من شبوا الكرم فيهم خلق مطبوع
*♦️ *فى قلقتى ناسا" ما اتبلت بالسوسه
ديل كل الفضايل عندهم مدسوسه
الزول المودر يمشى جوه يكوسه
يلقى غفر هناك واقف لها و محروسه
*♦️ *رحمات الكريم تتوالى خير واحسان
فوق روح الزعيم المكى ود عثمان
داره تعج تفور مليانه بالضيفان
معروفه المزارع للكرم عنوان
*♦️ *اغشاها الغويبه و فيها بِيت يالراوى
و ماتنسى الاسود الصوتا يهدر داوى
صغيرن فى الفراش محسوب مكمل ساوى
ديل قبال يجوك مارقين يجيك الخاوى
*♦️ *الهياله تلقى بحر فضايل و جم
الهياله كلها خير يمين من جم
فيها هناك رجال يتحدو بدر التم
ينفقوا بى سخاوه و ما بيعرفوا الكم
*♦️ *نروح نغشى الجزيره و نشهد الاكرام
سلالة الاكرمين من شبوا هم كرام
عافوه البخل فوقن جزم ماحام
و كان قلنا الرجاله اساس و راس قدام
*♦️ *عرِج ياللبيب و اغشى ام غدى ما تفوت
ولاد عباس هناك كرما قديم مثبوت
جودا"من كريم جوه النفوس منحوت
نارا" موقده ديمه ان شاء الله تب ما تموت
*♦️ *بسوى رجاله ضمه حقيقه فايته الحد
ناسا كذا الاسود ساعة الدواس و الجد
بسوى مناقب الخير فيها ما بتتعد
بسوى جوابه حاضر للبكوس الرد
*♦️ *مرى ضارعا فوق وصفي و قصيدى و نمى
فيها الخير مطفح و بالدروب مترمى
فيها رجال يمين الزول يجيك متحمى
ياخد الفقره قبال من عدوه يسمى
*♦️ *مابنسى اب هشيم بلد الاصل و العز
بيهم بفتخر فوقن ببشر اهز
مرتع للضيوف و قداحه ديمه تنز
و ايدا سامه عن ساعة اللطام بتجز
*♦️ *مرو عراقه و التاريخ ياكد ذلك
مرو منارة الليل و السواد الحالك
مرو دليل و خبره قديمه تهدى السالك
مرو عدوها قطعا ديمه خاسر و هالك
*♦️ *ارتل من زمان بين الخلق مذكوره
فيها العز سطع نجمو ارتفع فوق دوره
ابوالحسنين حليله الكان دليله و نوره
خلد ذكرى طيبه و فى النفوس محفوره
*♦️ *انجرى غاليه جدا و ليها ال سلام
ربنا يحفظا و يرعاها ناسا ارحام
انجرى ايدا ليننه عطوفه بالعدام
و فيها رجال بتنفق و تكرم الايتام
*♦️ *شريق دبكه البشاشه و ناس سترة الحال
شريق دبكه التجاره و تانى راس المال
شريق دبكه المحنه الزايده و الافضال
شريق دبكه العديل و الزين و راحة البال
*♦️ *الطرفايه دايما فوق لسانى بجيبه
تعجبك و تنبسط لمان تشوف ترحيبه
عندها شان مقدره لينا باقيه حبيبه
مسميه و مشكره ما فى زول بيعيبه
*♦️ *معروفه ام ندى قبلة هوى العشام
فيها الصالحين و اهل الكلام التام
ليها الناس تهاجر و مافى زول بنضام
و فى الخلوات هناك الناس تصوم العام
*♦️ *انزل فى اب سلم تلقى اليزيد شامخين
صامدين كالجبال قوه و فراسه ودين
ليهم فى الفعال الطيبه مافى ازين
و التقى فوق وجوهم نور و ليها يزين
*♦️ *فى الكربه الرجال اهل العلم و العرفه
و من زمنا بعيد زرع الفضايل حرفه
ديل صندل اصيل ماهن لحايه و قرفه
للعشمان بصيره و للمحير صرفه
*♦️*الرباطاب
*♦️ *ديل اهلى العبيرن فى الافق فواح
و ديل الكل زول لابس الفضيله وشاح
ديل المجدهم فيه الخلق سواح
و الجود المتسب حاشا مو رحراح
وكت الصف يميل و النفس يتخمى
و ساعة الناس تضيق و ريحة العرق تنشمى
ديك الساعه شوف بحر التساب العمى
ديل كل الكلام من عندهم بنتمى
د. ابراهيم عثمان سعيد عبد الحليم
مدونة عتمور الإلكترونية السودانية
الخميس: 8/1/2026
atmoorsudan.blogspot.com
——————•••••————
🔴 🔴🔴🔴🔴 🔴 🔴🔴🔴🔴 🔴 🔴🔴🔴🔴
-———————•••••———
المدون: د.ابراهيم عثمان سعيد عبد الحليم
🔴 السلسلة التوثيقية- النسخة الأصلية
🔴مدونة عتمور الإلكترونية السودانية
🔴الموقع الإلكتروني للدخول مباشرة
................اضغط هنا...............
👇👇👇👇👇👇👇👇 👇👇atmoorsudan.blogspot.com
———————•••••————
🔴 🔴🔴🔴🔴 🔴 🔴🔴🔴🔴 🔴 🔴🔴🔴🔴
———————•••••————
ليست هناك تعليقات:
إرسال تعليق