إجمالي مرات مشاهدة الصفحة

الصفحات

شعر المدح ... من الأدب الشعبي في منطقة الرباطاب بالسودان ( 9 )

                                              من كتاب 

من الأدب الشعبي في منطقة الرباطاب بالسودان
الشاعر / مصطفى الحاج موسى
حياته و نماذج من شعره
دراسة تحليلية
جمع و إعداد / إبراهيم عثمان سعيد عبد الحليم
8 فبراير 1989م
شعر المدح
من الأدب الشعبي في منطقة الرباطاب بالسودان
نحنا
قصيدة في مدح أهل عتمور ( 1  ) 
 عيال الوسطى في دار الرباطاب بالسودان
لشاعر الرباطاب/ مصطفى الحاج موسى
نحنا الساقيه نحنا الحلقه  و التوريق
نحنا العطفه نحنا الدروه  و الكوديق
نحنا الفوله نحنا التمره نحنا مريق
نحنا الصاقعه نحنا البي نفرج الضيق
بي نمد ايدنا للقاصد يجينا صديق
و القاصد الخصام لازم نحرقوا حريق
***
نحنا صفوف  و نحنا كفوف
و واضحين كالقمر للعاقل البي يشوف
ما بنرجع ورا  تب  ما بنعرف الخوف
سم الساعه نحنا الطعنه جوه الجوف
في العتمور هناك أولاد دروع  و سيوف
و في شاطئ البحر  ( 2  ) أسياد نخيل و جروف
***
نحنا تقانق الحوض الجبد واسوقو
نحنا الشوكه للداير يفوت بنعيقو
نحنا سنابل القمح الطبق ماروقو
نحنا الجدول الطامح هدر سبلوقو
_________________  
( 1 ) مناسبة القصيدة: قيلت هذه القصيدة في مدح و وصف  أهل عتمور عيال الوسطى بدار الرباطاب بمحافظة أبوحمد بولاية نهر النيل بالإقليم الشمالي  في السودان، وعتمور هي بلد الشاعر مصطفى الحاج موسى .
( 2 ) شاطئ البحر: يقصد شاطئ النيل، والبحر يعني النيل في عموم مناطق شمال السودان.
Facebook.com      Ibrahim Osman
***

من كتاب 
من الأدب الشعبي في منطقة الرباطاب بالسودان
الشاعر / مصطفى الحاج موسى
حياته و نماذج من شعره
دراسة تحليلية
جمع و إعداد / إبراهيم عثمان سعيد عبد الحليم
8 فبراير 1989م
شعر المدح
من الأدب الشعبي في منطقة الرباطاب بالسودان
أنا عتمور 
قصيدة في مدح و وصف  بلدة عتمور(1) 
 بدار الرباطاب بالسودان
لشاعر الرباطاب/ مصطفى الحاج موسى
أنا عتمور 
أنا الخدره المفرهدة  فوق ضفاف النيل
أنا التواقه لى كل المتين و جميل
أنا الأصبحت بي فوق لى زحل و سهيل
أنا الفي الحاره رفعي بعيد و باعي طويل
و أبدا ما بيقاس بالميل
أنا العلم البرفرف في سماهو ظليل 
أنا الثوره الموشحه بي حزام أبريل
 أنا عتمور
أنا عتمور أنا المرسى البلم التائه الغرقان
و أنا الفريت جناح الرحمه للغلبان
و أنا الأصبحت نجمه تضوي في السودان (2)
و أنا  المعروفه لى كل الإنس و الجان
ولدي فلان و ولدي فلان 
و آخر زول عقرت عليهو
 أب عثمان (3) عشا الضيفان
أنا عتمور
أنا عتمور أنا الجيران يعرفوني
لأني وفيه ساعة الحاره يلقوني
أنا المضيافه سموني
تلوت الليل أنزل ضيف أودع ضيف و فاتح ديمه ديواني
أنا الحولت مجرى النيل (4) أنا الخدرت ودياني
أنا السباقه و الناس ما بيجاروني
 أنا عتمور
أنا عتمور أنا اللقوني ود لقاى
أنا الربوني بالعز و الحنان دفاى
أهلي كرام وجدي قبيل سديد الراى
و بشير على الناس البعرفوا نباى
 أنا عتمور
أرضي حضاره من حفاري (5) للعابداب (6)
عمل الخير بتمو  و ديمه باديه الباب
عندي الطابيه فوق ودجنه (7) تاريخا بدورلو كتاب
باينه  و تلقى فوق جدرانه أثر الحربه و النشاب
أنا عتمور
بالعين عاليه و الناس تشابي علي
بالتاء تاريخا يعرفوا الناس و كل الحي
و بالميم مله للحساد بخلف الكيه فوق الكي
بالواو وا شقاوة المدا إيدو علي
و بالراء راحه للعشاق سكنة الحي
سلام و رخاء و دوام بالبركه يدعو لي
أناعتمور

Facebook.com      Ibrahim Osman

___________   
(1)عتمور: بلدة عتمور عيال الوسطى في دار الرباطاب بمحافظة أبوحمد بولاية نهر النيل بالإقليم الشمالي بالسودان، بلدة الشاعر مصطفى الحاج موسى.
(2) إشارة إلى مدرسة عتمور الثانوية العليا بنات، والتي حازت على المرتبة الأولى على عموم مدارس السودان في الشهادة السودانية بعد سنوات من إفتتاحها عام 1981م.
(3) أب عثمان: خدر ود علي ود مصطفى. و أما عثمان : فهو أستاذ الجيل عثمان خضر علي مصطفى أبو سليمان، عمل معلما بوزارة التربية و التعليم السودانية في مطلع السبعينيات بالجوير ( جوير ود ضبعه ) بمنطقة شندي، وبمدارس عطبرة و عتمور و كرقس بولاية نهر النيل بالإقليم الشمالي بالسودان، و هو من المعلمين المثقفين المشهود لهم بحب القراءة والإطلاع. هجر مهنة التدريس باكرا متفرغا لأعماله الخاصة  ،مقيم حاليا في الخرطوم بالسودان. و هو الآن رجل أعمال معروف، و صاحب مشروع زراعي كبير بمنطقة كديته في دار الرباطاب بالسودان. قال الشاعر مصطفى الحاج موسى عن مشروعه: 
نمشي على كديته القربت تتكده
جبنالكم خريف بعد اليباس و الشده
جبنالكم بحر بي لبقه ما بنسده
(4) إشارة إلى قيام مشروع وادي عتمور الجديد، أسسه أبناء الراحل المقيم عباس ود علي ود مصطفى عام 1988م بعتمور بدار الرباطاب بالسودان.
( 5 ) حفاري: إشارة إلى الحفافير حدود عتمور من ناحية الشمال مع العبيداب.
(6) العابداب: إشارة إلى العابداب حدود عتمور مع أمكي من ناحية الجنوب.
(7) ودجنة : إشارة إلى موقع  طابية عتمور قريبا من مقبرة ودجنة فوق العباسي في عتمور شمال.  

*****
                                  من كتاب
من الأدب الشعبي في منطقة الرباطاب بالسودان
الشاعر / مصطفى الحاج موسى
حياته و نماذج من شعره
دراسة تحليلية
جمع و إعداد / إبراهيم عثمان سعيد عبد الحليم
8 فبراير 1989م
شعر المدح
من الأدب الشعبي في منطقة الرباطاب بالسودان
قصيدة في مدح / العمدة علي عمر البشير  ( 1 ) 
عمدة عمودية مقرات بدار الرباطاب بالسودان
لشاعر الرباطاب / مصطفى الحاج موسى
حلق يا صقر الليله حوبتك جات
كسار الرجال نمر الخلا  أب عاجات
حلق يا صقر و اضرب من الجنبات 
و الليله الخبر خبر القميريات
الليله الحسود مرضان من العبرات
و يبكي من الألم  و حتى الدموع سايلات
يا ود عز رباط  يا لافي للعوجات
أسياد الملك من الزمان الفات 
في زمن الرجال لابسه الجويريات
جدك يا علي كان لابس الخودات
فرزاع للصفوف يا فارس الغزوات
و فرحان أب سباع أب سول ( 2 )  مع مقرات
بترد الكلام أسرع من الطلقات
بالرأي السديد بتحكم الجلسات
متلك ما بتجيب كل المديريات 
و بي تعز الوطن يا أخو البديريات
***
الليله السلاح فوق أب حمد ( 3 )  قجه 
و في كل البلاد استمعت الضجه
دا الدابي العشاري الساكن اللجه
و بالرأي و القلم بتقابل الحجه 
الليله الحسود  ضرب الخلا و دجه 
حار بيهو الدليل و ما عارف الفجه 
***
أهلا بي علينا الفارس الضرغام 
يا جبل الحديد الإسمك الرزام 
يا بحر المحيط ما بيقطعوا العوام 
إنت المدفع الخلا القصور شرام 
وين الليله وين يا قادة الإجرام
البسوا توب حدادكم و كسروا الأصنام
أرسلناهو ليكم في الصفوف قدام 
يا المابنو جاكم فوق رؤوسكم حام
***
دي الدايره ( 4 )   البتشبه غابة الأفيال
و ما بتجيب زويلا يبقى ليها خيال
بتجيب المحنك و سلسلة أبطال
زي علي ود عمر الفارس المفضال
إن مشى في الأرض زي رزة الزلزال 
شخصية أسد مصنوعه من نابال
________
( 1 ) مناسبة القصيدة : ذهب الشاعر مصطفى الحاج موسى مع وفد أهل عتمور عيال الوسطى بدار الرباطاب بمحافظة أبوحمد  بولاية نهر النيل بالإقليم الشمالي بالسودان  لتهنئة العمدة علي عمر البشير- له الرحمه - عمدة عمودية مقرات بمناسبة فوزه في انتخابات الجمعية التأسيسية لعام 1968م عن دائرة أبوحمد ممثلا للحزب الوطني الإتحادي فارتجل هذه القصيدة، ثم ذهب الشاعر للخرطوم مع وفد الرباطاب لمقابلة الزعيم الأزهري عام 1968م، ومدح الشاعر  الزعيم إسماعيل الأزهري بمجموعة قصائد  ، فأطلق عليه السيد الرئيس الزعيم / إسماعيل الأزهري  لقب شاعر الحزب الوطني الإتحادي. 
( 2 ) أب سباع و أب سول : أماكن في دار الرباطاب بالسودان.
( 3 ) أب حمد : حاضرة الرباطاب بالسودان بولاية نهر النيل بالإقليم الشمالي بالسودان.
( 4 ) الدايرة : دائرة أبوحمد للجمعية التأسيسية لعام 1968م  - دائرة انتخابية - يتنافس فيها  على مقعد واحد الرباطاب والمناصير، واليوم هي دائرة أبو حمد رقم( 1 ) بولاية نهر النيل.
ُُE-mail: abdulhaleamibrahim@hotmail.com
Facebook.com      Ibrahim Osman
***

من كتاب 
من الأدب الشعبي في منطقة الرباطاب بالسودان
الشاعر / مصطفى الحاج موسى
حياته و نماذج من شعره
دراسة تحليلية
جمع و إعداد / إبراهيم عثمان سعيد عبد الحليم
ملاحق الدراسة بعد 8 فبراير 1989م ( م ر 3 )
شعر المدح
من الأدب الشعبي في منطقة الرباطاب بالسودان
قصيدة في مدح / مبارك عباس علي مصطفى ( 1 )
معتمد  أبوحمد  سابقا بالسودان
لشاعر الرباطاب / مصطفى الحاج موسى
عليك الاعتماد من يوم نشأت صغير
و سموك المبارك يا صباح الخير
يا الدقر ابو سواميت ماك دقير الطير 
يا الدابي المربعن في رواسي الكير
يا مطر السواري الما بتخلي حفير 
و يا فصل الربيع الماك هبوب أمشير 
بشراك يا أب حمد ( 2 ) لاقوهو بالتكبير 
كل الكان يبيس الليله صار خدير 
***
اتمنيت دوام لو كنت لي جناح
انزل في أب حمد و أشارك الأفراح
أشرقت الشمس و بان الضحى الوضاح
و اتفشى الظلام الليله ولى و راح 
***
الإنقاذ دوام ترشيحا دايما صاح 
وبي يعرف مكان القوه والإصلاح
يسد الخانه في كل المكان إن راح 
في الخلاء فوق أسد و في البحر تمساح
هبالنا النسيم عطر الندى الفواح 
و الطير في الغصون غرد كنارو و صاح 
***
قولي القلتو فيك و الله ماهو إشاعه
يا قمر السبوع الما بندور ولاعه
العاجبني فيك قوه و شموخ  و شجاعه
و الوطنية في دمك عقارب ساعه
الوطن العزيز بتبقى ليهو مناعه
من كل المآسي و ما بتجيهو مجاعه
ان بقى للزراعه إنت من زراعه
و ان بقى للعلوم ماخد عليها براعه 
***
من زمنا بعيد النار تبق وقاده
في داخل القلوب تب ما لقت أخماده
ملينا وتب ما لينا أصلو قياده
كلو الجانا راح زود ألمنا زياده
لو كان ما بيقولوا الشئ  قسم و إراده
ما كان الزلط يسبقنا لام كداده
عهدك يا المبارك كلو خير و سعاده 
و تمام البلد بي يعمروها إسياده
_______
( 1 ) مبارك عباس علي مصطفى، من أبناء عتمور عيال الوسطى في دار الرباطاب بمحافظة أبوحمد بولاية نهر النيل بالإقليم الشمالي بالسودان، معتمد أبوحمد السابق، عمل ضابطا بالقوات المسلحة السودانية. شهدت فترة عمله في معتمدية أبوحمد عددا من الإنجازات و في شتى المجالات . و كمواطن من   بلدة عتمور بمحافظة أبوحمد  بدار الرباطاب ،عرض المبارك  هموم منطقة الرباطاب في عرضحال إلى رئيس الجمهورية  عبر صحيفة الأخبار السودانية. كانت له مواقف مشرفة و مشهودة مع أبناء المحافظة الذين كانوا عونا له طيلة فترة عمله معتمدا لمحافظة أبوحمد بدار الرباطاب. أثبتت تجربته في معتمدية أبوحمد أن أبناء المنطقة هم الأنسب لتولى منصب المعتمد في كل محافظات السودان .  و ما يزال المبارك  يعطي في مجال العمل العام. و بجانب ذلك فله تجارب وخبرات زراعية واسعة، يمكن الاستفادة منها في تطوير الزراعة بمحافظة أبوحمد  و ولاية نهر النيل. حفظك الله ورعاك معتمد أبوحمد السابق مبارك عباس علي مصطفى.
( 2 ) أب حمد : حاضرة الرباطاب بولاية نهر النيل بالإقليم الشمالي بالسودان.
Facebook.com      Ibrahim Osman
***

من كتاب
من الأدب الشعبي في منطقة الرباطاب بالسودان
الشاعر / مصطفى الحاج موسى
حياته و نماذج من شعره
دراسة تحليلية
جمع و إعداد / إبراهيم عثمان سعيد عبد الحليم
8 فبراير 1989م
شعر المدح
من الأدب الشعبي في منطقة الرباطاب بالسودان
قصيدة في مدح / البروفسير عبد الله أحمد عبد الله( 1 ) 
حاكم الإقليم الشمالي سابقا بالسودان 
لشاعر الرباطاب / مصطفى الحاج موسى
انطق يا لسان لا عقده لا عتراسه
فوق عبد الله يا دوب الحديث اتواسه
إن جات المحافل إنت من حداثه
و إن هدر الصفوف إنت البتمسك راسه
اختاروك لأنك صافي من دناسه
و الوطنية فيك خبره  و علوم  و دراسه
احكم دنقلا  و احكم بلاد الباسه
و احكم شندي بيك تفخر يضوي تراثه
***
نحنا أهل الملك  و العزه نحنا أساسه
عباسيه نحنا قريش تمام  وراثه
بي يعرفونا ساعة الصافنات برجاسه
نقتحم الصفوف  و الموت نكوسوا كواسه
واقعة أب حمد أجدادنا لاقو رصاصه
عكره يا أب زنود ديمه الوعور كباسه
في يوم الرجال اتكتمت أنفاسه
مين غير أب حجل ( 2 ) قهر الأعادي  و داسه
***
جنا مقرات جنا كجي وكجنقيلي و جنا الصيحان
جنا السيال جنا الكرمل جنا التكنه و جنا أم ضحيان
جنا كرقس جنا عتمور جنا أمكي و جنا العربان
جنا الكدق جنا الباقير جنا الزومه و جنا الخيران
جنا الباوقه جنا بربر جنا شندي جنا أم درمان
جنا الخرطوم على كل  جنا  السودان
***
جنا ضنقل جنا شايق جنا منصور
جنا جعل القبيل للحاره كانوا صقور 
إياك ابن الشمال و شمالنا بيك فخور 
و ما فرقت ما بين تنقسي  و عتمور(3)
و إياك الوليد المن زمان مدخور
_________
 ( 1 ) البروفسير عبد الله أحمد عبد الله :من أبناء الرباطاب السنجراب بالجزيرة مقرات بالسودان،كان حاكما للإقليم الشمالي ( ولاية نهر النيل و الولاية الشمالية ) بالسودان في عهد ثورة مايو 1969م. حفظه الله و رعاه البروفسير عبد الله أحمد عبد الله حاكم الإقليم الشمالي سابقا.
(  2 ) أب حجل : ملك عموم الرباطاب بالسودان.
( 3 ) عتمور: بلدة عتمور عيال الوسطى  بدار الرباطاب بمحافظة أبوحمد بولاية نهر النيل بالإقليم الشمالي بالسودان، نسبت إليها  صحراء العتمور المشهورة في شمالي السودان.  
***
abdulhaleamibrahim@hotmail.com
Facebook.com    Ibrahim Osman

***********************
من كتاب

من الأدب الشعبي في منطقة الرباطاب بالسودان

الشاعر / مصطفى الحاج موسى

حياته و نماذج من شعره

دراسة تحليلية

جمع و إعداد / إبراهيم عثمان سعيد عبد الحليم
8 فبراير 1989م

شعر المدح

من الأدب الشعبي في منطقة الرباطاب بالسودان

قصيدة في مدح / أبو أمين ( * )

إبراهيم علي محمد أحمد الكدب
أحد أقربائه

لشاعر الرباطاب / مصطفى الحاج موسى

في مدح أحد أقربائه 
على الكرار ( 1 )  أبوك رجلا بتم الكيف
وحفيان القدم يجرى ويقابل الضيف
شدرتنا الظليله البارده  ساعة الصيف
ويا بحر الدميره العم فوق القيف
أبشر يا رهومه  تعال أمسك السيف
هز فوق البنات شكلك تقول ود ريف
×××
زغرتي ليهو يا ملكة( 2 ) جمال أم در*
ودا الحفارى* دابى الليل مأصل حر
الفى الحاره دا الحاشاهو ما بيتر
وجدو الكدب اسمو العلقمابي* المر
×××
ديل أهل أم غدي*
وأهل الجزيره* العايمه وسط النيل
وفى عتمور * غرب*
 اسياد جروف ونخيل
العابداب* جدودك زى تلوب الشيل
واهل الحضره ديل ناسا يقيموا الليل
تسلم لينا يا درة شباب الجيل
ويا ابراهيم ( 3 )  قمر عشره البضوى الليل
اياك الخزين ود الأكانوا قبيل
دراجين عطاله وبى يزيلوا الميل
جدك مهدى ( 4 ) كان في الغربه لينا دليل
منزلة الضيوف الما بيعبر الكيل 
**********
* مناسبة القصيدة في مدح أحد أقربائه، أبو أمين: 
إبراهيم علي محمد أحمد الكدب. 
( 1 )  علي الكرار :
الخال ( الوالد ) على محمد أحمد الكدب، فهو الأخ الأكبر لأمي زينب محمد أحمد  الكدب. من أعيان عتمور عيال الوسطى  بمحافظة  أبوحمد بولاية نهر النيل بالإقليم الشمالي  بدار الرباطاب بالسودان، رحل باكرا إلى أم درمان مطلع الأربعينيات من القرن الماضي ،  وأقام في حى العرب بأم درمان  بالسودان، ومعروف بالشهامة و الكرم. وله أياد بيضاء علينا جميعا نحن أبناء عتمور. ويرجع إليه و أسرته الكريمة  الفضل في تعليمي، وخاصة في المرحلة الجامعية و مرحلة الدراسات العليا، و تعلمنا منه الكثير، فجزاه الله  و أسرته الكريمة  عنا خير الجزاء، و جعل  كل  ما قدموه  لنا في موازين حسناتهم.
( 2 ) يقصد ( أم الجميع ) ملكة مهدي:
 أم ابراهيم وجميله وبثينه وأميمه علي محمد أحمد الكدب ( جميعهم مولودون في حي العرب بأم درمان، و الآن مقيمون في أم درمان بالسودان، حفظهم الله و رعاهم).( الرحمة و المغفرة لمن رحل عن دنيانا الفانية من آل الكدب و طول العمر مع موفور الصحة و العافية لمن بقي من آل الكدب على قيد الحياة). 
* أم در : أم درمان العاصمة الوطنية  بالسودان.
* الحفاري:
 نسبة إلى الحفافير، و منازلهم   في  عتمور شمال، و في مقرات و أبوحمد بدار الرباطاب  بالسودان، و يرجعون  في نسبهم إلى علقم بن رباط.
* الكدب العلقمابي:
 الكدب :
 هو محمد أحمد الكدب، من أعيان عتمور عيال الوسطى بدار الرباطاب بمحافظة أبوحمد بولاية نهر النيل بالإقليم الشمالي  بالسودان، والد علي الكدب.( ينظر: إبراهيم عثمان سعيد عبد الحليم،السكان و المساكن و الأماكن في عتمور بدار الرباطاب بالسودان ،  مدونة عتمور عيال الوسطى في دار الرباطاب بالسودان، atmoorsudan.blogspot.com / www.google.com).  
العلقمابي :
نسبة إلى علقم بن رباط ( الشجرة الأولى في نسب الرباطاب، ينظر: د. هيثم مصطفى سليمان: شجرة أنساب الرباطاب) ، و العلقماب منتشرين في دار الرباطاب بمحافظة أبوحمد بولاية نهر النيل بالإقليم الشمالي بالسودان، و منازلهم في عتمور( منهم: آل الكدب بالسنيبلة جنوبي عتمور  و الحفافير شمالي عتمور)،  و منازلهم أيضا في مقرات و أبوحمد و الزومة و الشريك و سبنس بمحافظة أبوحمد بولاية نهر النيل بالإقليم الشمالي بالسودان.
 * أهل أم غدي:
 إشارة إلى حقوق و أطيان و أراضي آل الكدب في أم غدي عتمور شرق بدار الرباطاب بمحافظة أبوحمد بولاية نهر النيل بالإقليم الشمالي  بالسودان.
* أهل الجزيرة :
 إشارة إلى حقوق و أطيان و أراضي آل الكدب في  جزيرة السنيبلة و الجزيرة قوي في عتمور  بدار الرباطاب بمحافظة أبوحمد بولاية نهر النيل بالإقليم الشمالي  بالسودان.
* عتمور:
بلدة عتمور عيال الوسطى بدار الرباطاب بمحافظة أبوحمد بولاية نهر النيل بالإقليم الشمالي بالسودان، نسبت إليها صحراء العتمور المشهورة في شمالي السودان. 
* عتمور غرب:
إشارة إلى سواقي آل الكدب بعتمور بدار الرباطاب بمحافظة أبوحمد بولاية نهر النيل بالإقليم الشمالي  بالسودان و منها: ساقية آل الكدب في  السنيبلة في عتمور جنوب، و ساقية آل الكدب في العباسي في عتمور شمال، و ساقية آل الكدب في الحفافير في عتمور شمال،  و غيرها من سواقي و حقوق و أطيان  و أراضي  آل الكدب  في عتمور غرب  و وادي عتمور، و في مناطق دار  الرباطاب الأخرى بمحافظة أبوحمد بولاية نهر النيل بالإقليم الشمالي  بالسودان. 
* العابداب:
 من أشرف الأنساب في دار الرباطاب بمحافظة أبوحمد بولاية نهر النيل بالإقليم الشمالي  بالسودان، و يرجعون في نسبهم إلى عابد بن  رباط " العابداب أبناء عابد بن رباط  في عتمور " ( ينظر: روايات عن أصل الرباطاب محرك بحث www.google.com)، و منازلهم في عتمور جنوب  بدار الرباطاب بمحافظة أبوحمد بولاية نهر النيل بالإقليم الشمالي  بالسودان ، و منهم: الفكي حسين صاحب المشهد المعروف  و الدومات المشهورة  و عندها تقام صلاة العيد الثانية في عتمور جنوب بدار الرباطاب بالسودان.و كما هو معلوم فإن مكان صلاة العيد الأولى تقام  في المروة  فوق السنيبلة - بلد جدي الكدب له الرحمة -  في عتمور جنوب بدار الرباطاب بالسودان  ، و أما مكان صلاة العيد الثالثة فكانت تقام في القولة في عتمور شمال بدار الرباطاب بالسودان.
و العابداب منهم  آل الكدب و  آل العبد و آل مهدي و آل العكام و آل ريق النوم   في حي العرب و المسالمة  بأم درمان بالسودان، و منهم أيضا آل سعد الله  بالعيلفون بالخرطوم بالسودان .
( 3 )  ابراهيم : 
هو ابراهيم على محمد أحمد الكدب أبو أمين،  ولد  فى حى العرب بأم درمان. و يعمل حاليا مديرا إداريا في سلطة الطيران المدني بالخرطوم بالسودان.
( 4 )  مهدى: 
هو مهدي محمد حسين جد ابراهيم لأمه، أبو ملكة، من أوائل الرباطاب الذين  أقاموا  فى حى العرب بأم درمان. ويعتبر منزلة ضيوف في أم درمان  بالسودان.
 وأبناؤه : الطيب وفتح الرحمن وأحمد مهدي ( أحمد قربه: الآن مقيم في دولة الإمارات العربية المتحدة "أبو ظبي").
 و بناته: ملكة و حرم  و درنده و نعمات و زينب مهدي.
 الرحمة و المغفرة  لمن رحل عن دنيانا الفانية  من آل مهدي، و طول العمر مع دوام الصحة و العافية لمن بقى من آل مهدي على قيد الحياة.




abdulhaleamibrahim@hotmail.com

www.facebook.com     Ibrahim Osman

***********************







   










هناك تعليق واحد:

الاشتراك في: الرسائل (Atom)