.....................بسم الله الرحمن الرحيم .....................
السلسلة التوثيقية - من ارشيف المدونة الالكتروني
مقتبس من الادب الشعبي في دار الرباطاب بالسودان
إعادة نشر: الخميس 23/10/2025م ( استراحة المدونة)
إعادة نشر: الخميس /15/10/2025م( استراحة المدونة)
إعادة نشر: الخميس 21/8/2025م ( استراحة المدونة)
إعادة نشر: الأربعاء 22 مايو 2024م
إعادة نشر: 1/5/2024م
السلسلة التوثيقية : نماذج مقاطع قصائد لعدد من شعراء منطقة الرباطاب بالسودان .
ارشيف مدونة عتمور الالكترونية السودانية.
ابراهيم عثمان سعيد عبد الحليم
—————————————————————
🔴 و نورد نماذج مقتبسة من شعراء منطقة الرباطاب بالسودان محتواها: وصفي و ذكر لرموز و أعيان، و لمدن و قرى و أماكن، و لمواطن الحسن و الجمال بالمنطقة.
و المقارنة مع شعراء من خارج المنطقة.
و هذه النماذج من أدب الرباطاب الشعبي بالسودان و التي وردت في استراحة مدونة عتمور عيال الوسطى، مقتبسة من عدد من شعراء المنطقة و نذكر منهم و على سبيل المثال : الشاعر الدكتور / علي شبيكة و الشاعر / عبد الحفيظ محمد أحمد و الشاعر/ مصطفى الحاج موسى و الشاعر/ حسن دنقلا و الشاعر الفنان/ محمد ود عبد الباقي. اللهم ارحمهم جميعاً و اغفر لهم و ادخلهم جنة الرضوان .
و طول العمر مع موفور الصحة و العافية و امد الله في أعمارهم: الشاعر /كرم الله حسن الخضر و الشاعر أستاذ الجيل/ تاج السر الماحي الطاهر و الشاعر / محمد الحافظ السعدابي.
و في المقارنة مع شعراء من خارج المنطقة نذكر منهم و على سبيل المثال:
الشاعر / عمر البنا و الشاعر / ود الرضي و الشاعر / عكير الدامر و آخرين.
اللهم ارحمهم جميعاً و اغفر لهم و ادخلهم جنة الرضوان .
ابراهيم عثمان سعيد عبد الحليم
مدونة عتمور الإلكترونية السودانية
مصادر مواقع إلكترونية سودانية متعددة
—————————————————————
🔴 المقدمة : ديل أهلي الرباطاب(1-8)
(1)
ديل العزهم فوق الخلق مترامى
ديل مصدر قصيدى وشعرى هم الهامى
ديل عشقى السكن جواى قديم وغرامى
ديل فى كل محفل صورتن قدامى
ديل اهلى المتل عقد الجواهر الاصلى
ديل سندى و قفاى عزى وجوابى وفصلى
فوق نيران هواهم من صغِير مصلى
ديل ارحام و ديل حبل الموده و وصلى
—-
(2)
رباطاب صر و ما فينا راجل خامل
وفي علم الفراسه عاملين بحوث ومعامل
و في اعراضنا تب و الله ما بنجامل
نحن اولاد رباط نحن الدمار الشامل
—-
(3)
ما تشوفنا مسلوبين جسومنا نحيله
المكتوم كتير و الريد حمولو تقيله
في العك البقيس نبض الرجال ويكيله
ايدنا بتلفخ اب فقرة و تمشي عديله
—-
(4)
دقري طريقنا ماهو بالرذيله معرج
و معروف سيفنا من اعداو ما بتكرج
يوم ردحي الخيول لما السنون تتكرج
جيب اولاد رباط و اقعد بعيد و اتفرج
—-
(5)
نحنا العفه و الاخلاق و حفظ الدين
ونحنا اولاد رباط وين م تمش ظاهرين
الدايرنا خير بنشيلو في العينين
و الدايرينا شر بنلاقي سيفنا سنين
—-
(6)
عمد و الاود عمد و الشكره فوقن خايله
في الجود و الكرم و الفرسه ايدن طايله
بلدنا بالدهب ملت الخزاين كايله
ناسا مجربين في التم و ضبح الشايله
—-
(7)
في ساعة الدواس ترياقن جمر
احذر منهم وكت العين تصر
ﺩﻳﻞ ﻓﺮﺳﺎﻥ ﺩﻭﺍﺱ ﺗﺮﻳﺎﻗﻦ ﺟﻤﺮ
ﺩﻳﻞ ﺍﻭﻻﺩ ﺭﺑﺎﻁ ﺣﻘﻮهو ﺍﻟﺸﻜﺮ
ﺣﺎﺑﺴﻴﻦ ﺍﻟﺪﺭﻭﺏ ﻓﻮﻗﻢ ﻣﺎ ﺑﺘﻤﺮ
ﺣﺎﺭﺗﻴﻦ ﺍﻻﺭﺽ ﺯﺍﺭﻋﻴﻦ ﺍﻟﺘﻤﺮ
ﻟﻠﻤﺤﺘﺎﺟﻴﻦ ﺳﻨﺪ ﻣﺎﺑﺪﻭ العذر
ﻓﻮﻗﻦ ﺍﻟﻨﻴﻞﺣﺼﻮﻥ ﻓﻰﺑﻄﻦ ﺍﻟﺠﺰﺭ
ﺩﻳﻞ ﺍﻭﻻﺩ ﺭﺑﺎﻁ ﺣﻘﻮهو ﺍﻟﺸﻜﺮ
—-
(8)
أحفاد تركة العباس عبد أمي و عبد مناف
و ربنا أمرو ما بين نون و قادر و كاف
بدو و عربان و شاهد ربي يا الأشراف
خِفاف الظِل سماحه و ذوق و بينا لطاف
تقابل كم تشق وِديان تفوت بالعِدوه
عَبِره في خيالك و قِيٌسَه في كل خُطوه
حضاره وإرث وهم تاريخ وأعظم سطوه
ما بتفرزو كلهم أهل أحبه و إخوه
سلالتكم قبايل نجد و قطفان و الحجاز و كنان
صبر و وقار و صدق و أمانه و ود و تفان
تعرفو الشان تنجدو كروب أهل عِرفان
سفينة نوح تلمو هلم تشقو اليم من الطوفان
عجايبك سبعه نفحات خلدت أسماء
ويا أم مغدي ثراك عنوان ولينا سماء
شلعن فى مصابيحك بجهرن أضواء
دعاشك هبه يوت حدفتي يا شيماء
—————————————————————
🔴 نماذج قصائد لشعراء من دار الرباطاب بالسودان1-18
و المقارنة بين شعر الوصف عند شعراء الرباطاب و بين شعر الوصف عند بعض الشعراء السودانيين من خارج المنطقة.
(1)
أشواقي لي بلدي الحبيبة ديمه العيون تفضحا
اشتقت للنيل و الضفاف و الجلسه في ضل الضحى
اشتقت لي بلدي الحنينه اشتقت قولة يمه يابه
حليل جلسة عشية العامرة بالناس الغلابه
—-
(2)
ماذيني انا يا رفيق
ظبيا سكن الشريق
......................
و أيضا:
شتيلة المشرق الفوق القيوف نديانا
و من بعدك حياة الكون على مسخانا
الشالو القطار ما اظن في يوم ينسانا
تبكيك الشريق عتمور عليك حزنانا
—-
(3)
أنا عتمور:
أنا الخدره المفرهدة فوق ضفاف النيل
أنا التواقه لى كل المتين و جميل
أنا الأصبحت بي فوق لى زحل و سهيل
أنا الفي الحاره رفعي بعيد و باعي طويل
و أبدا ما بيقاس بالميل
أنا العلم البرفرف في سماهو ظليل
أنا الثوره الموشحه بي حزام أبريل
......................
و أيضا:
أنا عتمور بالعين عاليه و الناس تشابي علي
بالتاء تاريخا يعرفوا الناس و كل الحي
و بالميم مله للحساد بخلف الكيه فوق الكي
بالواو وا شقاوة المدا إيدو علي
و بالراء راحه للعشاق سكنة الحي
سلام و رخاء و دوام بالبركه يدعو لي
......................
و أيضا:
العتمور موشحه بالنواصى الغر
العتمور جواهر وفيها صافى الدر
العتمور كرم معدن مأصل حر
العتمور سند ساعة الليالى تزر
......................
و أيضا:
يا عتمورنا أقولك بى أمانا
حبنا ليكي زي روحنا و جنانا
......................
و أيضا:
عصير المنقه و الانناس
عتمور نورت يا ناس
......................
و أيضا:
دا الضل الرهين الناس تطردوا مقيل
و في نص الدرب ديوانو باقي سبيل
......................
و أيضا:
في عتمور
داير أشوف السوق الكبير
و الدكاكين مضروبه جير
في قوار بي جمب ود توير
و حتى صالون الكوافير
يبقى بي فوق الحفافير
......................
و أيضا:
شدر البرتكان مايل فريعو متنا
ميل بالثمار سلب العقل هجولنا
أديتكم أمانه و قلت عاد يا أهلنا
داير وكت أموت أرقد قصاد ود جنا
(القصاد مشهد ود جنا بعتمور ساقية جدي الكدب)
—-
(4)
أهل النيه يا بيضاء للنباري و السيال
حبيناكي يا مقرات من غريبا لى بربات
......................
مناي في قدله ان لقيتا
من اللافاب لى كديته
و حليل مقرات يا حليله
......................
قلبا بالغرام محروق للسنده القصاد زروق
(سندة ود العرضي في مقرات)
......................
و أيضا:
حليل الكان بضوي سمانا زولا سكنو السجانه
......................
و أيضا:
دي الهالكة البلد بي شوقا و مقرات تبكي لي زروقه
......................
و أيضا:
إنتي لاكي من السنجراب
و لاكي من صيد العلقماب
عيني شايفه و انا قلبي حاب
و ماني فايق للاسكراب
......................
و أيضا:
بنخلي البلد عارفين رزقنا على الله
قالو مشيت خليتا ليك يا بله
سولك فيها سينما و دار رياضة و سله
......................
و أيضا:
في راس الجزيرة الليله لى يومين
ضهبان و السؤال ناس النقر بى وين
خليتن زمان جوه الضلام ساكنين
اتاريهو الزرق و انا قايلو دا الكاملين
.....................
و أيضا:
انتي الجمروه و وضعوهو في البترينه
زي نجف الحبش عينيكي يا وزينه
ايه غير الخدود جوه القليب ماذينه
لى غرب اب حمد مقرات خلاص نوينه
—-
(5)
يا ارتل هواكي ملاني لهيب الغربة جمرو شواني
وين ارتل نخيلا و نيلا مشتاق لى رمالا و ليلا
يا مولاي متين امشيلا أنسى الغربه و أنسى مقيلا
—-
(6)
من المسلمية طيبة راحت تدني
و السواق يقول لمتين اصل ود مدني
ود مدني جاتك يا عظيم يا سني
قول محفوظة عندنا ما بين الحفظ و الأمن
—-
(7)
حسن الظباء فات الغزال الأسمر
فتان الشمال الاهلو من ناس بربر
......................
و أيضا:
القديم متبور يا ظبية باره
ترد الروح لو تجيك في الداره
......................
و أيضا:
جدك ود سعد في دولة المهديه
بتار لى رؤوس الخونه و الهمجيه
و ناس المك نمر دابي و سكونه الليه
لى أهل الشقالوه نرسل البرقيه
للعمراب شعديناب مع العوضيه
نقول ليهم خلاص عوض الله ناوي الجيه
......................
و أيضا:
جلجل صوتو فوق العتامير شقه
نورك فوق زحل ختم الثريا و بقه
ساردية جعل للحارة بي تتلقه
خشم المدفع الفوق العوالي موقه
بجر النمه فوقكم و انتو بيها أحقه
يا الدهب الأصيل الما بيباع باللوقه
أشبال ود سعد كان للعوازل مله
بالسيف المبرقع بي يقابل الجله
واجب شكركم في يوم نحاسكم كله
يوم الخيل تصهل و السيوف تتسله
—-
(8)
ام درمان سلام
يا العاصمة يا الفيكي راحة روحي
كم ساهر ليالي و كم شفيتي جروحي
—-
(9)
ما قدرت القعاد مشتاق و نشفان دمي
سهران الليالي و ديمه زائد همي
حبك زاد على حب ناس أبوي و امي
و لى اجلك قمت قاصد البقعة افرج همي
—-
(10)
يا امدر اسرني جمالك الحور و الحسان اترابك
مالك روحي اصلو شبابك حي الموردة و عمرابك
......................
و أيضا:
عاشق ديسك المردوف يا وارد جنائن اب روف
العاشق ليكي كلو يشوف بى يبرد حرارة الجوف
—-
(11)
دويسة الفالق البرطن فروده
البشروط دوده بالشقين يحوده
تحت لى أم عقارب و فوق حدوده
أهل المملكة و العز جدوده
أبواتك تخوجل فوق عروضه
......................
و أيضا :
يا مرسالي قوم أكشف ضمايـرو
والطير البطير دايرك تطايــــــــرو
نهــار الصنة ما تخاف من هجايرو
أمش في ديرتو و إستاذن وزايرو
يرجـــــــاك نايم ومتوسـد ضفايرو
طيـــــور الجنـة غنت في سراريو
نســـــــايم الليـل تداعب ستاريو
يقــــوم من نومـو يتوشح حرايرو
يفــــــرلك خاطـرو يبدلك بشايرو
روحي و ليمـو في الاتنين تخايرو
ده قعود أب صالح النسف دوايرو
الوليد عند دقت الكبوت يضايـــرو
......................
و أيضا :
يا مرسالي قوم لـــــــــــم الشفاته
أرجوك لا تسوي الخيت في الخياته
وراء سبعين رويحتك طول حياتــــــه
قبب الصالحين هدم راياتـــــــــــــــه
مشايخ العلم أقطع صلاتـــــــــــــه
أحذر بالي من سحر الفلاتـــــــــــــه
وجيب سيد العروق من جوره ذاتــــه
روح شيخ الحلب سوقلك شحاتــــــه
عجوزاً كاهلة ختاتة ومشاطــــــــــــه
روح شيخ العفاريت سوقلك تلاتــــــه
يقلبو الكون يسوطو الكون سواطـــه
البحار بي نيله أملاحه و فراتـــــــــــه
جبال القلبة سكانه ورعاتـــــــــــــــــه
تجي الحازت جمال الكون وراتـــــــه
عبيلجة سماد بدر الحراتـــــــــــــــــه
أقيف عند بابه وأمسك الصقاطــــــه
وقولها فرقك مسخ الدنيا وحلاتــــــه
......................
و أيضا :
يا مرسالي قـــــــــوم لي زولي قولو
كفاك الشفتــــــــــو زي ما تقولو قولو
قولو الروح معاك بلا الجتة ايش فضلو
قولو قيــــد القدرة في رجلــــو انطلبو
قولو نشفان ريقو ما قــــــــــــادر يبلو
قولو أدوه الموية قـــال لي شن أكلو
قولو إكسير البلــــــــد قلعـــــــوه كلو
و نبت عـــــــود الخراب قام في محلو
و البوم و الغراب قيـــــــــــل في ضلو
حسين الحاج شوفلي سبعين إيش حصلو
إن بقا غــــــــــادي من تسني تصلو
و إن بقـــــــــا في سرير النوم تدخلو
قـــــــــــــــدر ما يتعذرلك لا تقبلـــــو
مخصــــــــــــــــم بالله أوعــك لا تخلو
و إن ما جبتو لا تجـــــــــــــي كلو كلو
......................
و أيضا :
شتيلة المشرق أب عســـلاً ينقع
الفسل حراسة حامينـــا الموقــع
الشايل صبيطك مايـــل ومتفــدع
ولا رمينا ولا خلينــه النجــــــــدع
إنتي جننتي العقل ما ظنو يرجع
يحن زي حنة النوق البرضــــــــع
......................
و أيضا :
شتيلة المشـــــــــــــــــــرق الردفولك الما
الفسل حراســـــــــــــــــــة حامينا المرمه
متين يا دغســـــــــــــــــــــــــة العين نتلمه
كان بكاء كان فــــــــــــــــــرح كان اي لمه
اضحكي خلي ريحه ينشمــــــــــــــــــــــه
أضحكي شان نشوف سنونك في الضلمه
اضكحي لينا شـــــــــــــان ننسى المهمه
أضكحي لليتيم شـــــــــــــــان ينسى يمه
و إن شلتيه ما بكـــــــــــــــى تاني ضمه
اتنين فيكي ما بيختلفـــــــــــــــــوا ضمه
أوصافك جميعه توافــــــــــــــــــق النمه
......................
و أيضا :
دويسة الفالق الما بتعام مصنــك
التماسيحك من الـــوز يحرسنـــــك
طيور الجنة كل ليــــــــــل يمسنك
ب توب الدلال والريـــــــــد كسنك
اريتن كان غشنـــــــي وحدسنك
وبالنضم البريـــــــــــــدو يونسك
من جهل الصغر أماتـك ما وصنك
فطيمات الرضاعــــــــــــة يآلفنك
إن وقع التوب ضفايرك يدسنــــك
السنة الشعـــــــــــر لو أوصفنك
يلقن ديــك فرقـــــــــــا شته منك
معاهـــــن ما بتعيلي ان شتمنــك
جاراتك بدهن كـــــــــل حين يجنك
ودوب ما جيتي ما قـــادرات يرجنك
و بي حسن السيرة نسجن و توجنك
......................
و أيضا :
البراقو زنقــان
الهرج حس رعدو و سحابو دائماً يمشي ريقان
وعتمور أبو حمد أنا عليك حد عمري عشـــقان
قلقان في رقادي أنا ديمة قلقـان
أكان ما نيرانه أنا بي دمعي غرقان
وكان ما دمعي أنا بي نيرانه حرقـان
مدبورة القدم ما فيها سيقان
سابل ديسـه ما سولو قيقـان
دي جوهرة الانجليز الحارسة الجـان
......................
و أيضا :
بعد التوبه أنا و قلبي أختلفنــــــــه
و من فارقني لليوم ما أتشاوفنـــــه
والسبب ست الجمال الفوقة حفنه
حسنك فاق على شوفنا و وصفنـــه
نحن أولاد رباط ما بقولوا خفنــــــه
نشيل الفاتحة نتعاقد طرفنـــــــــه
نيشانجية ما بيكضب هدفنــــــــــه
لا ورا ما بنتر كان إتردفنــــــــــــــه
و فوق إسم الله صادقين إن حلفنــه
كيف الشورة يا اختي الغربة عفنه
—-
(12)
ديكا أولاد عبيد ساكنين حدانا
أهل الحوبه في ساعة قسانا
......................
و ايضا:
من زمنا قديم زمن الصحابه
انتو أهل القلم و أهل الكتابة
أشوف نورك شلع فوق للسحابه
من عمرابه لى عبد الله يابه
......................
و أيضا:
خلاص يا قيس كفاك من الغرام و الشوق
تسيب جنة عبيد بلد الجمال و الذوق
شتيلة فرهدت من غير سماد ماروق
ان ختوها في الماء العكر بى تروق
......................
و أيضا:
تسيب جنة عبيد بلد الحواريات
و زي خيل السبق وكتين يجن واردات
عيونن ختت اب عشره البلا نقشات
رقابن صيد هويد فوق العدو شارفات
التعليم وصل و تتقطع العلات
و الثانوية بي فوق للسلوماب جات
(السلوماب ساقية جدي طيب الاسماء الحاج)
......................
و أيضا:
نحنا عتامره نحنا كراقسه نحنا اماكا
نحنا أولاد عبيد و شمخة جبال التاكا
نحنا الملكه هيلنا و ما معانا شراكا
نحنا اذا غضبنا امريكا جاها هلاكا
......................
و أيضا:
بدور شارع ظلط يربط قرانا
و الكاملين يكون في مستوانا
......................
و أيضا:
أجاويد البلد في الدنيا مفهومين
و المشبوكه بي يحلوها بي ياسين
......................
و أيضا:
الليلة أنا بجر قافكم سمح عاجباني
جملة عيال عبيد ما فيكم الوراني
......................
و أيضا:
العبيداب
سيرتكم مضت سارت بها الركبان
اهل نجده ومروءه وتنقذوا الدركان
محمودين خصال عفه ومعاها لسان
وبين الناس جميع امتزتوا بالاحسان
نعم اولاد عبيد بين الخلايق شان
والتقى والصلاح هيلكم صفاء وايمان
الجود والكرم من غير منازع دان
والبنكر فعالكم فى الحقيقه مدان
فى سوح العلم قاده ورموز واعيان
نورتوا الدياجى و ما تركتوا مكان
فى يوم العبوس تتقدمو الفرسان
تميلو من الطرب متل التقول عرسان
فوق اولاد عبيد يا لسانى جيب اوزان
و انظم للقصيد شكرا سمح مليان
ديل سم العقود البقطع المصران
و ديل تاية الضعيف و البائس العريان
داركم عامره ديمه وقبله للضيفان
و جبارين خواطر تكرموا العشمان
الزول الضعيف والغاشى والعدمان
يضحك و يتبسط يرضى و يقوم فرحان
يوم فرز الصفوف والناس تقيف كيمان
كوم اولاد عبيد انا عندى فيه مكان
ديل قمر الليالى البيض ملجلج بان
يهدوا السالكين و يتقلو الميزان
—-
(13)
طال بينا الغياب حلتنا يا حليلا
حبوب ود حسن قوماك عديلا
اوعا من العرق سارق و خد ميلا
......................
و أيضا:
كرقس يا مناظر يا جميلا
و من زمنا قديم العزه هيلا
فوق النيل صفوف شابك نخيلا
و ما أحلى السمر ساعة مقيلا
يغني القمري بي أصوات عسيلا
كرقس سيدا فيها يقول حليلا
......................
و أيضا:
كرقس من قديم مالكه السياده و هيله
كرقس دوحه وارفه ظلاله مافى مثيله
كرقس مكمن الخير بى ترابه و نيله
كرقس هيا قوم يا صاحبى عاد نمشيله
......................
و أيضا:
سليم قال ليا ما مسرور ...
و قال حلتنا فاقده النور
أقول يا يابا ود منصور
أقول يا شيخنا ود حاج نور
و ترجع ما تتم الدور
و يوم اتنين يقولوا حضور
—-
(14)
حرف الكاف دا متوسط حروفا
سعيد الدنيا يمشي "أمكي" و يطوفا
"أمكي" حنينة للأغراب ولوفا
و تضم الناس متال أما عطوفا
بريد أمكي و بريد نيلا و جروفا
و سمحة الموضة في دكان شروفا
......................
و أيضا:
يا سائق يلا عجل بينا
دموع الشوق جرحت عينينا
بعد دا الحال العودة لى امكينا
طريتا شكير يا حليل بينينا
......................
و أيضا:
أنا عاشق رمال أب ديس
و في حبك بقيت زي قيس
بعد دا الحال تكون باريس
و شركة نور تكون في أب قيس
......................
و أيضا:
امكى الجبره و العز و الجلال و الهيبه
امكى رجال اشاوس و المعادن طيبه
امكى سدانه البيت الكبير بنى شيبه
امكى ان شاء الله سالمه وديمه عامره و طيبه
—-
(15)
لولا الظروف حكمت علينا
يا الحبان ليكم ما نسينا
السلام يا أمن الامينا
لى اب سلم لى ناس الخزينا
......................
و أيضا:
رحمات الكريم تتوالى خير و احسان
فوق روح الزعيم المكى ود عثمان
دارو تعج تفور مليانه بالضيفان
معروفه المزارع للكرم عنوان
—-
(16)
يا داخل ام غدي صلي على المختار
عينك بارده ما تكون حاسد او سحار
......................
و أيضا:
في وادي أم غدي الليله صاح البوم
خربانه العبوس الخاينه ما بتدوم
ارجعي يا نفس للواحد القيوم
ومهما الزول يكون راجيهو هذا اليوم
—-
(17)
يا الداخلة أم الشهيد الليلة جينا سلام
يا بلد الكفاح كم زعزعت حكام
......................
و أيضا:
دي القدام و الجيل ورا
اجمل ملاك في اتبرا
—-
(18)
كلو بمضي أغنية مختارة من شعر الرباطاب:
كلمات الشاعر الامدرماني / علي شبيكه
من أبناء الرباطاب بالسودان - رحمه الله-
كلو بمضي و كلو بالايام بروح..
لاسعيد دامتلو فرحة و لاحزين بدوملو نوح...
لاهية بينا الدنيا لاعبة فيها نتغرب نتوه
القلوب بالشوق تحرق و الجروح تشفي الجروح..
كلو بمضي و مهما تقسى مصيري أنسى
انت ماشفته الصباح كيف بطل زي احلى همسة
يضوي بنورو الروابي ويضيف في كل حسن لمسة
و تنطلق ارواحنا فيهو بي شراع ماليهو مرسى..
و ننسى او نتناسى انو كل صباح لابد يمسى..
و كلو بمضي
و كل أيامنا الخوالي و كل ليلة بكرة تمضي
زي فصول الدنيا في موسم رحيلا..
و السنين و احلامنا و العشرة النبيلة
تبقى ذكرى وفي صحارى الفرقة واحتنا الظليلة
برضي راضي بابتعادي و ريدي زادي
و رحلة الاشواق طويلة.. و كلو بمضي
atmoorsudan.blogspot.com
للاستماع على اليوتيوب الرابط هنا 👇
حنان النيل | كلو بمضي | كاملة مع الكلمات - جودة عالية - YouTube
https://www.youtube.com/watch?v=VUssMH-jUKQ
—————————————————————
و أيضا:
🔴 للمقارنة غنى لام درمان من خارج المنطقة. أبيات الشاعر السوداني عمر البنا نموذجا و منها:
اشوف نعيم دنيتي وسعودا
إمتى ارجع لأمدر و أعودا
لي هون يا ربي عودا
يا المن فراقك أيامي سودا
......................
و أيضا:
🔴 وللمقارنة بين شعر الوصف عند شعراء الرباطاب و بين شعر الوصف عند الشعراء خارج المنطقة . أبيات الشاعر السوداني ود الرضي نموذجا و منها :
شالو حلوقن أدوهن قصيبات رقن
و شالو خدودن أدوهن ورود إتسقن
بدل عينيهن أدوهن كهارب بقن
و أنا ما أدونى من الريدة غير أتيقن
جن واردات و فجن قلبى شيشن شقن
أنا جنيت و كت نسام عطورن طقن
شافن حالى ضحكن قرقر و قعدن نقن
أرمى الدمعة فوق الدمعة و هن إتلقن
وين الطرفو ناعس و طرفى ليه محقن
وين الفاطرو فى شان خاطرو أموت واتلقن
الناس همها العيشة و طعام و دلقن
و أنا مكتول هوى المن حور الجنان إتنقن
" الشاعر السوداني ود الرضي "
......................
و أيضا:
🔴 وللمقارنة بين شعر الوصف عند شعراء الرباطاب و بين شعر الوصف عند الشعراء خارج المنطقة . أبيات الشاعر السوداني عكير الدامر و آخرون نموذجا و منها :
-يا مولاي أه من غلبي من النارو حرقت قلبي
يا مولاي بشكيلك شقاي و غلبي
حظي الديمة من ريدة الأنيس جافلبي
طالت السفرة و إتحفت مناسم تلبي
هب الريد تلبي و عاودك الحنين يا قلبي
مالك نفسي مطعونة تملي تنيني
مالك عيني لي الغميد أبيتي تليني
عطشان ديما طفح الموية ما برويني
كاتلاني الطريفية البريدا غريني
-الناس عيدت مرقت علي أصحابا
و أنا فريت علي الجاهلة السمح ترحابا
فاطرًا يحكي براق البدودي سحابا
دي لفت قلبي زي لف طرحتا اللافحابا
-يتمني الدهب لو لونو يشبه لونك
إشتهت الدرر لو هي تبقي سنونك
مجنون ليلي حالتو أقل من مجنونك
ما دام ليلي كانت في المحاسن دونك
-غصباً عني فارقت الضريح لي ربي
كل ما هب نسام منو زاد في جمري
جرحي القرب يبري الداير يبدر عمري
بدرو ليّ تغريد بلبلك يا قُمري
-أخضر ليهو ضل فوقو المحاسن شرن
و أفلج فاطرو زي برق السواري الكرن
يتقسم مقاطع في المشي و يتحرن
زي فرخ القطا الأماتو ركن و فرن
-عمي الهادي نشاب البريدا ضربني
قسم نومي من تيبان حيايا سلبني
حاكم الصافي أبي يقبل سؤالي صدمني
صبري الكان جميل جربتو و كلو غلبني
-عن من أحب أنا غير خاطري فرقت
هايم بي غرام عن حالتي كنت سُرقت
لولا أدمعي من ناري كنت حرقت
و لو ما ناري من كترت دموعي غرقت
ختت أيدها فوق إيدي انجذبت خِدرت
حبيت أمشي من كُتر الطرب ما قدرت
بقت الحنة بين إيدي و أيديها اندرت
لولا الحنة بيني و بينها كنت ودرت
-شعرك منتظم زي السلاسل فتلو
و عينيك ترقِص الحجر ان بقت شافتلو
الطاؤوسة قاصدة مشيكي ما عرفتلو
و أعصاب الرآك أتكهربت تلفتلو
-ممشوق القوام الما وجدتا مثيلو
جفاهو معاى و لا محنة غيرو
جافانى العزيز الكنتا ديمه نصيرو
هو يسوى الغلط و انا اسوي كتر خيرو
"الشاعر السوداني عكير الدامر و آخرون"
—————————————————————
atmoorsudan.blogspot.com
قصائد لم تكتمل ... و فرحة لم تتم
الشوق و الحنين في مرافئ الغربة
( مقاطع من قصائد المرافئ 1 - 6 )
المنتدى العام
عن
مدونة عتمور عيال الوسطى
الأربعاء، 18 ديسمبر 2013
atmoorsudan.blogspot.com
(1) عتاب قلب:
خلاص يا قلبي اخترت تسيبو و تنسى ماضيهو
و تنسى اللهفة و الأشواق تعيش في ظلمة ناسيهو
حرام و الله تنساهو و تنسى حنانو و أخلاقو
و تنسى الكان بعزك روح و تشهد ليك عويناتو
و كل البينا كان هفوات تعود أيامنا تصفالو
atmoorsudan.blogspot.com
.......................
(2) زمان و الله:
زمان و الله بي يفرّق و لمّن يقسو يقسو شديد
و من بعدك حرام و الله لا بنعشق و لا بنريد
atmoorsudan.blogspot.com
.....................
(3) مظلومة:
مظلومة و عذاب الدنيا مكتوب ليك
صابرة وسارحة في دنياك و كل الناس تهاتي بيك
عزيزة و سمحة يا زينة و أمل دنيتنا كلو عليك
حرام يا زينة تنظلمي و يبقى الحزن في خديك
ما إنتي الطيبة و الأخلاق و كل الناس بتشهد ليك
ما إنتي الريدة و الرقة و جمال بلدي المجسم فيك
صبرتي كتير على الحرمان و ياما الصبر بي يعزيك
كفاك عذاب ألم و أحزان و بكره الكون يزغرد ليك
وتعيشي الفرحة من تاني و أشوف البهجة في عينيك
atmoorsudan.blogspot.com
...........................
(4) تاجوج:
إنتي زي تاجوج حكاية و صورة في أجمل معاني
ما كفاية علي عيونك و شامه فوق خديك تلالي
atmoorsudan.blogspot.com
(5) وداع كسلا التاكا:
كسلا التاكا فيها جمال رائعه بكل ما فيها
زينة و عظمة غرب القاش و سبحان ربي باريها
تجلت قدرة الرحمن في خدرة سواقيها
......................
عشانك إنتي يا كسلا بحب الدنيا و الفيها
و بعشق للحلنقة هناك و للزول السكن فيها
و بشرب من مياه توتيل عشان أرجع و أعود ليها
......................
زهرة جميلة ست الناس بسأل ربي يحميها
خلاص نقلوك جنوب الفونج و شلتي قلوبنا بالفيها
و كيف معني الحياه بعدك و كيف نقدر نقاسيها
......................
و يا رب عودة من تاني و نزور "كسلا" و نلاقيها
"زبارة صفوف" جوار تكروف تسوقني خطاي نواتيها
و مهما قلنا فيها كلام محال " ناس كسلا " نوفيها
......................
و داعا يا نبع توتيل كرم أدروب و دعاش كسلا و بواديها
وداعا يا جبل مكرام عُلا توتيل و جبال تاكا و سواقيها
وداعا يا بديع كجراي حروف اسحق نغم ألحان شواديها
وداعا يا فراش القاش عطر فواح عصاريها و أماسيها
وداعا يا ديار تاجوج حكاوي الريد معاني الحب أغانيها
atmoorsudan.blogspot.com
......................
(6) مقرن النيلين:
(بيني و بين الشاعر الأردني زميلي الاستاذاحمد صالح العتوم - اجتمعنا في احدى مرافئ الغربة قبل سنوات -
" هذا ابن عثمان سن الجود أغنية "
هذا العتوم فاعط القوس باريها
" فإن الجود في السودان منبعه "
أنت الشريف ملك القوافي فمن يجاريها
و لولا الجود ما النيلين اقترنا
من للكنانة غير النيل ساقيها
بيني و بين تعاطي الشعر " أغنية"
جار الزمان و أيم الله ناسيها
أيا صاح جددت أياماً لنا سلفت
فمن لي بمقرن النيلين في الخرطوم "أغنيها"
atmoorsudan.blogspot.com
✳ ✳ ✳ ✳ ✳✳✳✳✳✳✳✳✳✳✳
🔴 🔴 🔴 🔴 🔴 🔴 🔴 🔴 🔴 🔴 🔴 🔴 🔴 🔴ابراهيم عثمان سعيد عبد الحليم
الموقع الإلكتروني لمدونة عتمور الإلكترونية السودانية:
..........................................👇👇 ............................
...............atmoorsudan.blogspot.com.........................
🔴 🔴 🔴 🔴 🔴 🔴 🔴 🔴 🔴 🔴 🔴 🔴 🔴
✳ ✳ ✳ ✳ ✳✳✳✳✳✳✳✳✳✳✳
بسم الله الرحمن الرحيم
مدونة الدكتور/ ابراهيم عثمان سعيد عبد الحليم
السلسلة التوثيقية : شعر المدح و الحماسة في السودان.
نورد فيما يلي من مصادر و مواقع مقتبسات نماذج لأسماء رموز و اعلام و شخصيات سودانية من عدد من المناطق السودانية.
و خلدت هذه الأسماء في الذاكرة السودانية بأغاني التراث الشعبي والمدح و الحماسةفي المجتمعات المحلية السودانية.
د. ابراهيم عثمان سعيد عبد الحليم
الموقع الإلكتروني: atmoorsudan.blogspot.com
(1)
من هو الباسل بابكر؟
صاحب الاغنية الشعبية التراثية : بابكر ضحوي هو الشخصية التي قيلت فيها قصيدة وأغنية الحماسة السودانية الشهيرة "الباسل بابكر"
التفاصيل:الشاعرة: زينب بابكر عبد الله الشوبلي
(أو زينب بنت بابكر ود ضحوي حسب بعض الروايات)، والتي ألفت القصيدة مدحاً وثناءً في جدها.المناسبة:
أغنية حماسة سودانية تراثية تبدأ بمطلع:
"بجر القول والشكر لي الباسل بابكر".
من أشهر مطالعها:
يَا بَنِيَّة جُرِي القدح
للأسد الما انفضح
أبوي مما قام قرح
بحر المالح طمح
المؤدون: غناها عدد من الفنانين السودانيين.
المصدر: مقتبس من مصادر و مواقع إلكترونية متعددة
--------------------------------------------------------------------------
(2)
من هو سيد محكر الديوان؟
القصيدة الشاعرة حـــمـــيـــرا
يقال أن هذه القصيدة قيلت في الحسن ود ضبعة عمدة الجوير
( الجوير قرية تقع شمال غرب شندى و هى واحدة من أشهر قرى الجعليين)
و ذلك عندما شكا عقلاء القرية للحسن ود ضبعة من تكسر الشباب على حفلة أقيمت بالجوير لعدة أيام بواسطة حميرا
(أشهر مغنية فى ذلك الزمن بمنطقة الجعليين من كبوشية
للعالياب للزيداب لى سقادى و الجوير و المتمة و بقية القرى هناك)
و ملخص الشكوى أن الشباب تحلق حول حميرا و تركوا أشغالهم و زراعتهم و تفرغوا للحفلة و البطان
و بالتالي تضاعف العبء على ذويهم من العقلاء فحمل الحسن و د ضبعة عصاته و سوطه و جاء ليفرتك
الحفلة و يطرد الفنانة من القرية..
و لما وصل لمكان الحفلة لقى الحكاية رابة و الجنيات تعرض و السوط يلعلع
( سوط البطان)
و أول ما شافته من بعيد متوجها نحوها و عيونه محمرات فهمت و قرأت ما يجول بخاطره
فارتجلت هذه القصيدة :
سيد محكر الديوان ثابت يا أب قلب..
فوقف و استمع وأعجبه الغناء و المغنية و الجو..
فطرب وهزّ بى عصاتو فوق حميرا و أداها قروش .. وقال ليها:
غني غناك أريتهم لا أكلوا لا شربوا
إلى أبيات القصيدة:
سيد محكر الديوان ثابت يا أب قلب
تقابة لي النيران وين متل الحسن
***
الحسن يا الحسن غنيتّا ليك بي قياس
صنديد لي الولايا ولي الدموع قشاش
يا مطر السواري الماك هبوب ورشاش
حنكو البليغ خلوهو يتحدث
سيد زيناً قبيل قبل الناس تعرف الناس
سيد أصلاً قديم من الحمزه والعباس
***
الحسن والحسن في عايلة ماتسمّا
ضباح الربايب سيد القدح لمّا
دالي وبرمكي وببرّد حشا العمّا
دا ولادة النجاح الما بتدرك البلما
شوف عيني التساب الفوق البلد عمّا
ود ضبعة التساب الفوق البلد عمّا
***
أناغنيت بولف ليك
ياالدابي العُشاري وزي الشرار عينيك
وخبر البندقية القالو دى بترميك
تلب يا الصقر توّر الرخم مني
***
الحسن يا الحسن دوام بغني لِي
تمساح جلقني وزي الشرار عيني
ما شال بندقية وقال بتحميني
تلب يا صقر جفل الرخم مني
المصدر: مقتبس من مصادر و مواقع إلكترونية متعددة
--------------------------------------------------------------------------
(3)
من هو اب عاجات اللحو؟
المقصود به هو العمدة "أبو جديري" (واسمه الحقيقي علي ود سعد محمد الشميمي)، وهو عمدة قرية "كُلي" بمحلية المتمة في ولاية نهر النيل بالسودان. وقد قيلت فيه مرثية ومناحة تراثية شهيرة غناها الفنان علي إبراهيم اللحو وتُعرف بـ "مناحة عمدة كلي" أو "أب عاجات".
الشاعر هو الشيخ أحمد محمد بشير الرياشي (المعروف بالشيخ ود البشير الرياشي)، من قرية الفرحسين.تفاصيل المناحةالمرثية: في رثاء العمدة علي ود سعد أبو جديري عمدة كلي (ولاية نهر النيل).الطول: نحو 280 بيتاً شعرياً.الظروف: نظمها على ظهر حماره بين كلي والفرحسين.التوثيق والتشتهر: مدّ بها الراحل معاوية أحمد سعيد الفنان علي إبراهيم اللحو لتصبح من أثيرة أغانيه.
المصدر: مقتبس من مصادر و مواقع إلكترونية متعددة
--------------------------------------------------------------------------
(4)
من هو الفارس الجحجاح؟
قصيدة : شدّولك رِكِب فوق مُهرك الجمّاح
في من قيلت هذه القصيدة :
صاحب هذه الأوصاف هو عمدة منطقة المفازة (جنوب ولاية القضارف في السودان) الشيخ حسن عبد الله طه، وهو الممدوح في أغنية الحماسة السودانية الشهيرة "الفارس الجحجاح" (المعروفة بمطلعها شدّولك رِكِب فوق مُهرك الجمّاح).
المصدر: مقتبس من مصادر و مواقع إلكترونية متعددة
--------------------------------------------------------------------------
من هو عبد القادر ؟
من هو المقصود بهذا المقطع في أغنية بنت النيل
دا الجنن عبد القادر
عبد القادر في مقطع «دا الجنن عبد القادر» من أغنية «بنت النيل» للفنان السوداني أحمد المصطفى (1922–1999) هو عبد القادر مضوي، وقيل ارتباطه بالاسم يعود لأفعاله الجنونية والطربية الغريبة أوقات الحفلات (مثل أكل الزجاج أو طعن نفسهن أو إثارة الصخب)، بينما تقول روايات شعبية أخرى إنه شاب من العيلفون جُن بحب فتاة النيل التي غرقت.تفاصيل الأغنية والقصة:الأغنية: «بنت النيل» للفنان السوداني أحمد المصطفى.الكلمات: تقاسمها شاعران:المطلع حتى قبل الأخير: للشاعر بشير عبد الرحمن (مهندس زراعي من كسلا، كتبها في منتصف الأربعينيات).المقطع الأخير («أحبّو وأحب نوناتو...»): للشاعر محمد أحمد الشيخ (الجاغريو).قصة المقطع: عبارة «في الجيل مثالك نادر / ودا الجنن عبد القادر» صارت مثلاً بسبب تفاعل عبدالقادر مضوي الطربي الشديد وتصرفاته المثيرة في الليالي والغناء.
المصدر: مقتبس من مصادر و مواقع إلكترونية متعددة
-------------------------------------------------------------------------
المصادر: مواقع إلكترونية سودانية متعددة
السلسلة التوثيقية : اسماء خلدت بأغاني التراث الشعبي و المدح و الحماسة في المجتمعات المحلية السودانية.
مدونة الدكتور/ ابراهيم عثمان سعيد عبد الحليم
الموقع الإلكتروني: atmoorsudan.blogspot.com
-------------------------------------------------------------------------
مرسلة بواسطة ABDULHALEAMIBRAHIM@GMAIL.COM في 10:03 م
إرسال بالبريد الإلكتروني
كتابة مدونة حول هذه المشاركة
المشاركة على X
المشاركة في FACEBOOK
المشاركة على PINTEREST
