بسم الله الرحمن الرحيم
♦️جرس امتحان الشهادة السودانية يقرع لأول مرة في يوم الاثنين 13/4/2026م بمركز الامتحانات بمدرسة الباقير الثانوية الحكومية العليا بنات بدار الرباطاب بولاية نهر النيل بالسودان.
🔴🔴 🔴 مدونة عتمور الإلكترونية السودانية🔴🔴 🔴
🔴عتمور- محلية أبو حمد-ولاية نهر النيل-السودان 🔴
🔴أبو حمد حاضرة شعب الرباطاب-ولاية نهر النيل السودان.
♦️السلسلة التوثيقية:امتحانات الشهادة السودانية2026م.
جرس امتحان الشهادة السودانية يقرع لأول مرة في يوم الاثنين 13/4/2026م بمركز الامتحانات بمدرسة الباقير الثانوية الحكومية العليا بنات بدار الرباطاب بالسودان.
د.ابراهيم عثمان سعيد عبد الحليم
مدونة عتمور الإلكترونية السودانية التوثيقية الشاملة
🔴(1)🔴
أستاذ الأجيال و شاعر الرباطاب الكبير/
تاج السر الماحي الطاهر برفقة مدير المدرسة يقرع الجرس.
للمشاهدة الرابط جرس الامتحانات يقرع لأول مرة بالمدرسة.
https://www.facebook.com/share/r/1bNfwjUERz/
🔴(2)🔴
استاذ الأجيال و شاعر الرباطاب الكبير/
تاج السر الماحي الطاهر. و تحية شعرية للطالبات الممتحنات من مركز مدرسة الباقير الثانوية بنات .
و تحية خاصة من شاعر الرباطاب لأعضاء الهيئات الإدارية و التدريسية و للعاملين بالمدرسة و لجميع المعلمين و المعلمات بالمنطقة و لعموم أهالي الباقير بدار الرباطاب بولاية نهر النيل بالسودان. للمشاهدة الرابط:
https://www.facebook.com/share/v/1CixEuEqFG/
🔴(3)🔴
شكر و تقدير من أهالي الباقير لاستاذ الأجيال و شاعر الرباطاب الكبير/ تاج السر الماحي الطاهر لتشريفه بقرع جرس امتحانات الشهادة الثانوية لعام 2026م و لأول مرة بمركز الامتحانات بمدرسة الباقير الثانوية الحكومية
العليا بنات بدار الرباطاب بالسودان.
(*وقفة إجلال.. وكلمة شكر من الباقير للسر الماحي 🙏🎙️*
🔴 *إلى الشاعر القامة، الأستاذ السر الماحي..*
في اليوم الأغر، يوم تدشين *مركز امتحانات مدرسة الباقير الثانوية للبنات*، حضرتَ فكان حضورك هو الحدث.
جئتنا بكلماتك القوية النابعة من القلب، فلامست وجدان كل أب وأم، ورفعت هامة كل طالبة. حديثك كان مزيجاً من فخر المعلم، وحكمة الأب، وبلاغة الشاعر.
*شكراً يا أستاذنا.. شكراً يا قامة بلدنا*
شكراً لأنك قطعت المسافات لتشاركنا فرحة انتظرناها سنين.
شكراً لأن كلمتك كانت وسام على صدر الباقير وتاريخ يُروى.
شكراً لأنك قلت بلساننا ما عجزت ألسنتنا عن قوله.
وقفتك في منبر مدرستنا لحظة للتاريخ.. والباقير كلها تدين لك بهذا الشرف.
كلمتك لبناتنا الممتحنات ستبقى محفورة في ذاكرتهن، ودافع لهن في الامتحان وفي دروب الحياة.
جزاك الله عن الباقير وأهلها خير الجزاء، وأمد في عمرك ذخراً للوطن والحرف والكلمة الصادقة.
* شكراً _ الأستاذ_السر_الماحي # شاعر_الباقير_الكبرى # مركز_امتحان_الباقير # كلمة_للتاريخ # الشهادة_السودانية*
المصدر : صفحة فيسبوك - مدني خليفة).
🔴🔴🔴🔴🔴🔴🔴🔴🔴🔴🔴🔴🔴🔴🔴🔴
🔴. سياحة في قرى و أرياف دار الرباطاب بالسودان 🔴
🔴شعر : أستاذ الجيل و شاعر الرباطاب الكبير: السر الماحي
و لقلة المراجع و المصادر التاريخية حول هذه المنطقة تعتبر هذه القصيدة كمصدر و مرجعية مهمة للباحثين؛ للتعريف بمنطقة الرباطاب بالسودان - الإنسان و المكان - كما وردت في تراث و أدب الرباطاب الشعبي بالسودان لشاعر الرباطاب الكبير و أستاذ الجيل/ تاج السر الماحي الطاهر من أبناء سبنس الباقير بدار الرباطاب بالسودان. و أدناه ابيات القصيدة:
*♦️*الرباطاب
ديل العزهم فوق الخلق مترامى
ديل مصدر قصيدى و شعرى هم الهامى
ديل عشقى السكن جواى قديم و غرامى
ديل فى كل محفل صورتن قدامى
ديل اهلى المتل عقد الجواهر الاصلى
ديل سندى و قفاى عزى و جوابى و فصلى
فوق نيران هواهم من صغِير مصلى
ديل ارحام و ديل حبل الموده و وصلى
من يوم ما وعيت و عرفت درب الهم
لقيت ريدكم ملك اعضايا و اصبح دم
انظم يا لسان جر القصيد و النم
فوق دار ود رباط بالحله جت من جم
الليله اللبيب حالف قراكى يسوقه
و الحب و السماح ينزل يعمر سوقه
مكتول من زمان همت و صبحت عشوقه
و غارت فى حشاى ضربت جوايا عروقه
*♦️ *السنقير موكر فى قلوبنا مقيم
جودو و خيرو وافر ديمه نفعو عميم
فيه رجال تقابلك هاشه ساعة الليم
و الواحد يتب عجلان و ديمه هميم
*♦️ *العقبه الصبر و الفرسه باقى اساسه
و فى اليوم الكريه معروفه شدة باسه
كضاب البقول حدد حدوده و قاسه
نستعزى و نبشر نحن فوق فراسه
*♦️ *زمامه من المحاسن جمله ماخده نصيبه
زمامه الضكره تب ماخداها كلها نيبه
زمامه النور جلال عشقا قديم و حبيبه
زمامه رجال رتوت حتى الثريا تجيبه
*♦️ *انزل يالبيب فوق الزويره و زوره
تلقى الناس تقابلك و الوجوه مسروره
من وكتا" قديم متحشمه و مستوره
ابدا مابتقابلك نافره يوم و نكوره
*♦️ *احذر يالبيب و اوعك تفوت عبادى
فيها رجال اسود حارسا الدرب و الوادى
فيها جنس كرم والله قط مو عادى
ظاهر فى الوجوه باين عليهم و بادى
*♦️ *سبنس للصَلاح و التقوى مسكن و باب
سبنس للمكارم و الحكم اسباب
سبنس دوحة وارفه و للصلح وجاب
سبنس كل زول من ناسا قولو صواب
*♦️ *من عند التكولى و لى ام سرح فد جره
فيها رجال تلوب فوق السهول منشره
مرين فى الكماج ساعة الحبس و الزره
وجودن فات و طوفن ضمه طامح بره
*♦️ *قنديسى الحنينه الطيبه دانيه قطوفه
تجود من غير حساب بين البلاد موصوفه
انزل ياللبيب سوح فى رحابه و طوفه
تلقى رجال موسمه للدواس مكلوفه
*♦️ *الباقير شموخ و عزا قديم ملموس
الباقير محصن و بالاسود محروس
الباقير علم ماهو الخفى و مدسوس
الباقير فضائل و مكرمات متروس
*♦️ *الكبانه غرفوا من المكارم و عبوا
الكبانه من ضرع السماحه اتربوا
الكبانه ساعة الحاره جت يتكبوا
الكبانه ريحا" عاصفه عاد كان هبو
*♦️ *اراك الخير حبيبه و فى القرار ست شور
عندها فى المحافل ديمه همه و دور
فيها سيوف تجز الهامه تاخد القور
و فيها رجال جزم للضيف تعقر التور
*♦️ *احذر من تفوت تتعدى ناس الزومه
ديل عدل الفضائل عندهم متمومه
كضاب البقول يوم بالغلط مليومه
فيها ايادى صادقه بتنصر المظلومه
*♦️ *ادخل فى الجزائر و ابدا بى سرنات
شيخنا احمد محمد و بركة الدعوات
مر بالتنسو روح من ام حجير كجرات
تلقى كرم ضيافه و طيبه مابتتفات
*♦️ *كان قلنا الغريب اياهو سيد الشكره
فيهو رجال تلوب ليهم مجالس وحكره
الواحد يهوش بالضيف و تاخده السكره
مابيضبح سخيل ينحر يجود بالبكره
*♦️ *الكودق رجالا كلهم اخيار
الكودق يمين سيف النصر بتار
الكودق عزيمه و عزه جاه و وقار
الكودق مراجل فى الشدايد ونار
*♦️ *سام التوم هناك و اب سول عليهم مر
تلقى هناك رجال مسميه حاله يسر
تارسين المخازن بالتمر و البر
باذلين الموده و مابيعرفو المر
*♦️ *انزل فى الحويراب تلقى واجب الضيفه
و كرما بى بشاشه كمان معاه حليفه
تامين الرجاله مكملين تصنيفه
حاتم طى زمان سووله تانى خليفه
*♦️ *عجل يالبيب لازم تقوم بى سرعه
تغشى الناس هناك تنزل تزور الترعه
الحظ غير شك و اتاها ماخده القرعه
لى صيد المكارم باقيا شركه و شرعه
*♦️ *ام مردى العطوفه و حانيه ماها شحيحه
فيها مساحه واسعه من الرجاله فسيحه
فى دار ود شبكنا القعده سمحه مريحه
و جودا اشد من مطر الضحى ام تلقيحه
*♦️ *معروفه الجريف بين المناطق قامه
و فيها الجود مطوفن و للمكارم هامه
فى خد دار رباط زينه ومنوره شامه
لازم من نحيى رموزه ديك و اعلامه
*♦️ *امكى الجبره والعز و الجلال و الهيبه
امكى رجال اشاوس والمعادن طيبه
امكى سدانه البيت الكبير بنى شيبه
امكى ان شاء الله سالمه و ديمه عامره و طيبه
*♦️ *العتمور موشحه بالنواصى الغر
العتمور جواهر و فيها صافى الدر
العتمور كرم معدن ماصل حر
العتمور سند ساعة الليالى تزر
*♦️ *عبيداب غير شك مافيهم المزغول
عبيداب للحديث المسمى و المدلول
عبيداب عزه مهما اقول عليهم اقول
عبيداب شامخه فوق الناس مكانه و طول
*♦️ *كرقس من قديم مالكه السياده و هيله
كرقس دوحه وارفه ظلاله مافى مثيله
كرقس مكمن الخير بى ترابه و نيله
كرقس هيا قوم ياصاحبى عاد نمشيله
*♦️ *حجر المك فوارس مافى ليها رفيق
حجر المك بحر .. فى الجود و ميزه غريق
حجر المك رجالا تلفى ساعة الضيق
و دايما فى الشدايد زاد و فكة ريق
*♦️ *فى امن الامان سعد النفوس و الراحه
و للخير كل زول ساعيلو كم طراحه
مهما اقول كلام و افرد له منى مساحه
هم فايتنو اكتر و فوقه زادوا فلاحه
*♦️ *تعالو جميع نحيى اهلنا فى القرشاب
صوتن عالى يهدر و بالخلوق رحاب
مهما اقول كلام بلقاه فيهم اصاب
سمحين الصفاة طيبه و كرم انساب
*♦️ *امشى على اب سلم واغشاها حيى رجاله
من قولة سلام حالا يتبوا عجاله
يفرحوا بيك يهوشوا وتعتريهم حاله
و كان قلنا الفراسه ركوز يحاكو جباله
*♦️ * كيف بنسى ام مريخ و اهل الفضل و الجود
ديل ناس المفاخر و العطاء الممدود
ديل قبلة عشمنا و كت نتوق و ننود
مدخورين يحلو و يرقعوا المقدود
*♦️ * ايدك يالزويره على المكارم حاقت
فيك الناس تبايع و الكفوف اتلاقت
دارك واسعه ابدا بالضيوف ماضاقت
و كل الناس تحن هيمانه ليك اشتاقت
*♦️ *التلب اللزوم المصطفى المحجوب
فى سفر العظام بالنور سطع مكتوب
جودو عجاجه شايل ديمه رِيِحو هبوب
و ام ضحيان ركيزه بتسند المغلوب
*♦️*مقرات نعمه من نعم الكريم موهوبه
مقرات نار كرامه من الجدود مشبوبه
مقرات خيمه للكرم الاصيل منصوبه
مقرات سيره طيبه الناس بيتحكوبه
*♦️ *الكرو للضعيف تايه و لقيمه وايد
الكرو كيله وافر و ديمه فوقه تزيد
الكرو للجميع بهجه و مسره و عيد
الكرو دار علم للصالحين و مسيد
*♦️ *غريب مقرات محصن و بالفضيله اتربا
شربان المكارم و انترس و اتعبا
ليه الحق يفاخر و كل زول يتنبا
فوق مجدا تليد قام اتربط فوق صبه
*♦️ *ولاد ضيف الله فى غرب الجزيره عيون
ولاد ضيف الله ديل سيف الدواس مسنون
ولاد ضيف الله در صافى و نقى و مكنون
ولاد ضيف الله قدرها بالدهب موزون
*♦️ *كديته من المكارم ماخده حظها وافى
و ليها سلام مربع و فوقه كم عوافى
كديته اصاله مو مغشوشه دمها صافى
ايدا تطول تسند الجاى طافش و لافى
*♦️ *انزل فى الطوينه العامره بالصلاح
ديل اهل العلوم والتقوى والاصلاح
ديل نار الكرم موقوده للبياح
ديل ناس ودقلوبه العلمه مو رحراح
*♦️ *انزل يالبيب و اتوجه الشلال
امانا جنس شهامه وامانا تلقى رجال
دارعين الكرم لابسنو جبه و شال
و محموده الخصال متبوعه بالافعال
*♦️ *اعبر النيل غرب و اتوجه السلتيب
تلقى وقار و هيبه و ناس مقاشره العيب
ما بلوكو الكلام و يكترو القِلِيب
راكبين الخيول للحاره و الجقليب
*♦️ *برضك امش شمال و اتوجه الشامخيه
تلقى الزول تقيل ميزانه يعدل ميه
فقرا و ناس صلاح يحجوا و يسدو الديه
و بين الناس مشكره سيرتن مطرِيه
*♦️ *العال للمكارم من قديم انحازت
العال خزنه حاوياها الفضايل و حازت
فيها رجال هميمه و شيكه يوم ما رازت
و فى كل المحافل و السباقات فازت
*♦️ *العشكوت خصوصا ليها منى اشاده
فى الجود و الكرم ما شفنا ليها نداده
عند ساعة الضيوف يجرى و يزيد عداده
فى يوم اللطام للناس رسانه و قاده
*♦️ *العسليه فى سافلنا باقيه مزاره
و ربنا من نعيمه يزيده يمحى اوزاره
ديل اولاد عمر سند الصفوف و كباره
ديل ركازه للسودان عموم و حباره
*♦️ *قبل تانى شرِق ياخي روح اب طين
تلقى عزاز اكارم اهل امانه و دين
يقابلو الضيف يبشروا فوقه بالسكين
قبل مايتم سلامه عليه يرمو يمين
*♦️ *جد السير جنوب يا خِلى روح الغابه
تلقى رجال هناك غرسوا المكارم غابه
سمحين الصفاة لابسين جلال و مهابه
تخلى الزول يفاخر الناس و يتفاشابه
*♦️*سلام ناس الفداء الشامخين عيال منصور
شكركم عندى وافر مابتشيلو سطور
زولكم فى الشدايد من قديم مشكور
و ايدكم وافره ديمه تجبر المكسور
*♦️ *إسمك ي أب حمد فوق راسنا نلبسه عمه
ما انتى القياده و مركزك فى القمه
مابتتوانى يوم الحاره عندك همه
فيك رجال يمين الواحد ايدو مسمه
التاج المرصع بالجواهر هيلك
و انتى اياكى ساسنا و راسنا الله و كيلك
قبلتنا وحرمنا نشد رحالنا نجيلك
واجبنا احترامك و كل رواد جيلك
*♦️ *دقش الجود سكن جوه البيوت اتحكر
دقش الناس اصال مافيهم البتنكر
دقش ارثا" قديم من الموده مسكر
دقش للناس تصافى وكت تهيج تتعكر
*♦️ *ميل يالبيب طوالى روح الكوع
ديل اهل الجناين و التمر مزروع
ديل قوت الرجال ايام مواسم الجوع
و من شبوا الكرم فيهم خلق مطبوع
*♦️ *فى قلقتى ناسا" ما اتبلت بالسوسه
ديل كل الفضايل عندهم مدسوسه
الزول المودر يمشى جوه يكوسه
يلقى غفر هناك واقف لها و محروسه
*♦️ *رحمات الكريم تتوالى خير واحسان
فوق روح الزعيم المكى ود عثمان
داره تعج تفور مليانه بالضيفان
معروفه المزارع للكرم عنوان
*♦️ *اغشاها الغويبه و فيها بِيت يالراوى
و ماتنسى الاسود الصوتا يهدر داوى
صغيرن فى الفراش محسوب مكمل ساوى
ديل قبال يجوك مارقين يجيك الخاوى
*♦️ *الهياله تلقى بحر فضايل و جم
الهياله كلها خير يمين من جم
فيها هناك رجال يتحدو بدر التم
ينفقوا بى سخاوه و ما بيعرفوا الكم
*♦️ *نروح نغشى الجزيره و نشهد الاكرام
سلالة الاكرمين من شبوا هم كرام
عافوه البخل فوقن جزم ماحام
و كان قلنا الرجاله اساس و راس قدام
*♦️ *عرِج ياللبيب و اغشى ام غدى ما تفوت
ولاد عباس هناك كرما قديم مثبوت
جودا"من كريم جوه النفوس منحوت
نارا" موقده ديمه ان شاء الله تب ما تموت
*♦️ *بسوى رجاله ضمه حقيقه فايته الحد
ناسا كذا الاسود ساعة الدواس و الجد
بسوى مناقب الخير فيها ما بتتعد
بسوى جوابه حاضر للبكوس الرد
*♦️ *مرى ضارعا فوق وصفي و قصيدى و نمى
فيها الخير مطفح و بالدروب مترمى
فيها رجال يمين الزول يجيك متحمى
ياخد الفقره قبال من عدوه يسمى
*♦️ *مابنسى اب هشيم بلد الاصل و العز
بيهم بفتخر فوقن ببشر اهز
مرتع للضيوف و قداحه ديمه تنز
و ايدا سامه عن ساعة اللطام بتجز
*♦️ *مرو عراقه و التاريخ ياكد ذلك
مرو منارة الليل و السواد الحالك
مرو دليل و خبره قديمه تهدى السالك
مرو عدوها قطعا ديمه خاسر و هالك
*♦️ *ارتل من زمان بين الخلق مذكوره
فيها العز سطع نجمو ارتفع فوق دوره
ابوالحسنين حليله الكان دليله و نوره
خلد ذكرى طيبه و فى النفوس محفوره
*♦️ *انجرى غاليه جدا و ليها ال سلام
ربنا يحفظا و يرعاها ناسا ارحام
انجرى ايدا ليننه عطوفه بالعدام
و فيها رجال بتنفق و تكرم الايتام
*♦️ *شريق دبكه البشاشه و ناس سترة الحال
شريق دبكه التجاره و تانى راس المال
شريق دبكه المحنه الزايده و الافضال
شريق دبكه العديل و الزين و راحة البال
*♦️ *الطرفايه دايما فوق لسانى بجيبه
تعجبك و تنبسط لمان تشوف ترحيبه
عندها شان مقدره لينا باقيه حبيبه
مسميه و مشكره ما فى زول بيعيبه
*♦️ *معروفه ام ندى قبلة هوى العشام
فيها الصالحين و اهل الكلام التام
ليها الناس تهاجر و مافى زول بنضام
و فى الخلوات هناك الناس تصوم العام
*♦️ *انزل فى اب سلم تلقى اليزيد شامخين
صامدين كالجبال قوه و فراسه ودين
ليهم فى الفعال الطيبه مافى ازين
و التقى فوق وجوهم نور و ليها يزين
*♦️ *فى الكربه الرجال اهل العلم و العرفه
و من زمنا بعيد زرع الفضايل حرفه
ديل صندل اصيل ماهن لحايه و قرفه
للعشمان بصيره و للمحير صرفه
*♦️*الرباطاب
*♦️ *ديل اهلى العبيرن فى الافق فواح
و ديل الكل زول لابس الفضيله وشاح
ديل المجدهم فيه الخلق سواح
و الجود المتسب حاشا مو رحراح
وكت الصف يميل و النفس يتخمى
و ساعة الناس تضيق و ريحة العرق تنشمى
ديك الساعه شوف بحر التساب العمى
ديل كل الكلام من عندهم بنتمى
د. ابراهيم عثمان سعيد عبد الحليم
مدونة عتمور الإلكترونية السودانية
atmoorsudan.blogspot.com
🔴🔴🔴🔴🔴🔴🔴🔴🔴🔴🔴🔴🔴🔴🔴🔴
المدون:د.ابراهيم عثمان سعيد عبد الحليم(النسخة الأصلية)
♦️ مدونة عتمور الإلكترونية السودانية التوثيقية الشاملة
🔴 الموقع الإلكتروني للدخول مباشرة للمدونة. 🔴
اضغط هنا
....................................👇👇 ...................................
............... .atmoorsudan.blogspot.com.................
🔴🔴🔴🔴🔴🔴🔴🔴🔴🔴🔴🔴🔴🔴🔴🔴
🔴الصورة : أستاذ الأجيال و شاعر الرباطاب الكبير/
تاج السر الماحي الطاهر. متعه الله بموفور الصحة و العافية و أمد الله في عمره و أيامه. atmoorsudan.blogspot.com
ليست هناك تعليقات:
إرسال تعليق