بسم الله الرحمن الرحيم
مدونة عتمور الإلكترونية السودانية
السلسلة التوثيقية - النسخة الأصلية
الصورة على صفحتي فيسبوك Ibrahim Osman
أخبار...اجتماعيات ... مناسبات......
———————•••••————
✳ مسدار عتمور ✳
بعد أكثر من 5 سنوات من العمل المتواصل
وأخيراً بحمد الله اكتمل (مسدار عتمور)
للشاعر المخضرم (محمد الحافظ السعدابي)
———————•••••————
✳ أحفاد تركة العباس عبد أمي وعبد مناف
وربنا أمرو ما بين نون وقادر وكاف
بدو وعربان وشاهد ربي يا الأشراف
خِفاف الظِل سماحه وزوق وبينا لطاف
✳ عزيزه قبيلتي دهب الماس بكانه بعيد
فيها العمده ود بيناوي أحسب قوم وخت لي شهيد
بلدي مُحِبه للضيفان بِتكرِم كم تسو وتعيد
فيها نِبال وفيها فراس وحب وحَصِيد
✳ تقابل كم تشق وِديان تفوت بالعِدوه
عَبِره في خيالك وقِيٌسَه في كل خُطوه
حضاره وإرث وهم تاريخ وأعظم سطوه
ما بتفرذو كلهم أهل أحبه وإخوه
✳ سلالتكم قبايل نجد وقطفان والحجاز وكنان
صبر ووقار وصدق وأمانه وود وتفان
تعرفو الشان تنجدو كروب أهل عِرفان
سفينة نوح تلمو هلم تشقو اليم من الطوفان
✳ عجايبك سبعه نفحات خلدت أسماء
ويا أم مغدي ثراك عنوان ولينا سماء
شلعن فى مصابيحك بجهرن أضواء
دعاشك هبه يوت حدفتي يا شيماء
✳ سلام يا آب ديس سلام غائب وأتاها ضِفافك
منك شبه فوق عتمور سردها سوالفك
صورك أبهي من ألوان وماليه غلافك
نموت في حُبِك آب نعشق ونبدي خلافك
✳ عَلًي بِتَعِز وأعزه من الأهل ما لقيت
وكل ما نزفت في الأحزان جروحك خِيّط
بكان ما حله قدم الضيف بمسكو وبيت
كتير بزكرلي جود أهلي وإردد أريت
✳ الأرواح علي الملكوت وبعد الدنيا متعارفات
وأزهر طلحك المنضود ربوعك مترفات
أرضك بِكْر سكنها الريل شتولك كُلَهِن باسقات
جيادك رُتَع ما بسابقوهن البي فطرتن صافنات
✳ أشجي وقول وردد وبُوح وزِيد في غُناك
عناقد فيك يا عتمور وأجنو جناك
كل البسمو في التاريخ دا حين ما جاك
هاجر تسعي بين المروه تنده وتستغيث بي ماك
✳ أرضي الخيره نوق ونخيل آرانب وقطاط
فوقه سعيه بلد كلاس وفارده بساط
صورتك منظر آ الخلابه قادر ربي فيكي هبات
جروفك زانت كم/وكانت كيف ونابته نبات
✳ قطع بالنيل وصرت من البداية دليل
لقيت أماكي في الخاطر حكيم وسليل
نشام جسر وأولاد أب كريك في النيل
طمح اليم سُرُوب الطير تخم وتشيل
✳ نزل في براح وصدري علي رحابها أراح
بدت عتمور وخاطري سعيد وزاد إشراح
أديمنا البيهو كُلا عزيز وعلم وفصاح
بلاد العُرب قيف ونخيل ونجمها لآح
✳ فكري إتشتت إلا الشوق كتير غامرني
وفي العابداب كرف نسام ولينها أسرني
سيف الحق قص في غمدو مد ونصرني
كرام القوم ومن بالفضل قام دافرني
✳ خَبِر وقول وسَلِم وحيي من في كِدانه
متبختر سعيد ورحل سكن وديانه
قول وفعال سواقي نشام وليها رصانه
تسقي عطاش وتهمي علي ربوعنا دنانه
✳ الأيام بتتوالي وعليك يا السنيبله تجيبنا
احسب كم وأعدد كيف وأنسي مشيبنا
فضايل شتي وإنهلت أبت ما تسيبنا
أنهار مِسّك وخمر وتيه وفوح طيبنا
✳ شرب الكدب أعطي الغاني لسليمان
مالك الطير قبل بلقيس وعرشها لآن
بكل خبر محيط وخله الهدهد أظهر وبان
الباطل انجلي وبعد الكبر إترجح الميزان
✳ كل ما لقيت عقاب كلمات بسطر اجر
ويا بخت البحيز من البديوين الصنادد ودر
آل ابو زيد وآل الهاشمي طوفه وزر
سخاهم فطره حفه القيف ثناء وشُكر
✳ خيار الناس ولي يابوده اكبر باع
تعيش زكراك علي الايام صباك ما ضاع
نم غنيلي فوق كل التويراب الجبابر وسباع
أحنو رؤوس إلا صغيرهم أمرو مُطاع
✳ فيها إدريس فيها عطوي وعلي والتاج
نار موقوده كم بتقج وضاويه سراج
حبسو النيل وفارس الحوبه كشر وهاج
اقدل فوت شن بنسو معاك يا أب عاج
✳ قادر المولي ناد لي موسي خره كَلِيم
صدح القمري يا أنور بلاغه وشيم
كم كم يا الديايب فيك بليغ ومُليم
متيم قلبي روحي تغب تعود وتهيم
✳ القرآن دليل نبراس وبخت الرتلو وبِقراو
لوح قدامي فوق الخلوه طوف ام راو
ازكر صل واهدي سلام بكل طراو
لي سيدنا الرسول لامن عيونا تراو
✳ غشيت جدول مبارك وقد جلست حداهو
هفات جسمي جمر الغيبه فيني كلاهو
ليهو سنين وبيهو ربيت وجوفي رواهو
كل أحبابي آل وصحاب منو الما سقاهو
✳ السعداب بكان أبواتي وأشرق وعمه
وولدك يا السرير شاعر عليهو مسمي
مقدس عندي ما بمسا لو بي كلمه
اهدر دمي فيهو بحور ولا أحيا وتجيهو مزمه
✳ السعداب قيم متروس ترجح كفو يا المأمون
ديمه بسود وسيرتو تلوح حجج وقرون
فيهو الجعلي وولاد حبوب وكيف ما ترون
تناد بي إسمو والسعداب كتااااار بهوون
✳ والسعداب جدودنا الأربعه البيهم نسبنا أصيل
حدفو الساقيه للغشم طفت بالنيل
ملوك الغاب وهم يعقوب وإسرائيل
بُوح يا شُعيٍب عَلِم وأروي جيل عن جيل
✳ سواقي سواقي بحسبهن وفي ساقية مدينه
عنابر اريج وربي انزل عليها سكينه
اسودك يا ام سماح وثبن حمنو عرينه
ربي أعطاك ووهبك يوت وصبت عِينه
✳ سواقي أحسِبها وأطرالي الكروشاب النَخِيلها رُضَيّب
فيها صروح مصطفي وراشد ويس واغتديت بشُعيّب
نور الظلمه بعد أبرق وامطر صيب
مقامهم ربي سطرو في صحايف الغيب
✳ فرات نهرين ودجله وملك فارس وكسري
وشرف الدين علم عنوان وأعرج واسري
أدني الأرض مكه وكم تآخو الفُقره
اقامو الليل وفي فد ركعه بتلو البقره
✳ عقد بالعزم ومن ود قرقس قبل غادي
صاح القمري للبلبل وغرد وإستدله الشادي
تقانق رطبه لينه رويه يوت بتنادي
أبواتنا القبيل شالوها من أجدادي
✳ قيم مغروسه بالأخلاق وكلها غيره
صفاتكم كلا خسران من ظفر بي غيره
طمي الأرض البكور الشمرت لي خيره
ياهو طميكو نسل أشراف وعينكو قريره
✳ فيك يا الزغوله ولآد صويحب وأيمن المنصور
الوجدان رنابنا يبت وحاد وصبور
فرح لا الغايه مبسوط منهم مسرور
اهلي رتوت وبيهم ديمه جد مأسور
✳ إتقدمت منها للزغوله وعن ولاد طيفور
وقاصد باليمين ظبياً جميل ونفور
أطلق سهمو فاح الطيب وند كافور
هرب من جنه ما أحلاهو من عصفور
✳ ردد واحكي زود للشريشاب نقي من القول
متلها نواة وأقصص ساي نشام وفحول
زرع الناس وغالي الغرس بجيك قندول
هشلو الطير وسولك حد وخت همبول
✳ بدت في عيوني والقوله بتحضن أحباب
عليها ربيت قريت لي فصول حفظت كتاب
آل عبد الله بيهم طارق أمه وأناب
عماد ناصر دليلي سهيل ونجم وشهاب
✳ العين البتدمع كل زول قد سرفت
واللقروساب علي شيم المكارم انجرفت
بساتين تدي تندي وبالمدائن إتوصفت
حدائق غُلبا فاكهة وأبا إنقطفت
✳ كتيره كنايتي هادي المره عباسي المسيد
ولي بحروفي ولي من اهلي خير وعيد
فيهم أمير وفيهم كم زعيم وعقيد
بقيفو شموخ بهزو جبال وبتنو حديد
✳ زور يا دليلي للهدعاب وأسرد وأزكر الكوليب
وآخر القول فل ياسمين وعنبر وطيب
جواهر الدر وقدر الفي سماي ما بغيب
أنجم شتي تضوي ربوع تهل وتغيب
✳ رزمن رعودك وطبلن وإتعددن أسباب
كرف نسام وكم نفحات علي الحسناب
خضر علي يمم أرضك سال ودفق وداب
عنوان ليك ورايه وقبله للأغراب
✳ أعلام بلدي ورثوها الشهامه وكيل وعبر وقيس
بلا الصالحاب آيات قد كان بلا المياييس
براكن شتي تغلي تفور وترمي نفيس
مبارك أكان وحت لا زال علينا حريص
✳ فاض كالنيل وكم ظافر نجد لي أهلو
تكشفو سرايرو وشيم العفه بتلألئلو
همو قبيلتو مين في الناس أكان بشبهلو
سامق فينا صعب ووين بنلقي المتلو
✳ انطِق يا لساني ونم في الكركراب لا تخته
كنوز تيجان ملوك أرضي وغوال الشكته
غمام وسحاب ووآبل أحباب تدلدل وخته
طمر الأرض وطاف بالناس وأكرم وأعطه
✳ بعد تدله في الحفافير تعال سامرني غن واشجين
بكل صراحه ما سمعتوبو ساك عبد الله ود الأمين
مهما لبسنا في الظلمات وبطن الحوت نجيك سالمين
رام في صدرو كل الناس وضلل للبشر يقطين
✳ مشيت قربت ولا وسط العبيداب للنهايه بروح
وكدي طليت وهاشم ألمك عهود وصروح
أقرن حاجبو وأنقي وشيو بشوش وصبوح
خيرك فاض وعمه جبال وكفه ضروح
✳ وصل كرقس جرارق الطامه يا الملاوي
منو الغيركم بكشف/ الغمه وبفوز وبقاوي
سرجتو أبال دفعتو من البريه بلاوي
أزلتو الظلم وزكرتوني ود بصراوي
✳ شلتو كتير وحاتم الطائي جاء وكازانا
ليكم كم وفوق مليون تحسبو سفانا
أكارم الناس بترفع بسواعدها وتآزر أوطانا
نكلو بالأعادي أزمان وتركو حزانا
✳ يا نجم الثريا فخار وشيم ونماس
متلهم أعِزه أهل وقبيله رافعه الراس
هُصور وجرارق آ الحبان تلوب وفراس
وثاقب الراي وراجح العقل كيف بنطاس
✳ كوثر نيلك آعتمور ومين قبالك
حمام الأيك حلق وحطه في حلالك
يا المزيونه فيك أنغام ووآرفه ظلالك
المضيوم بنوح بك والكناري غنالك
✳ مسدار عتمور
الشاعر /محمد الحافظ السعدابي ✳
———————•••••————
🔴د. ابراهيم عثمان سعيد عبد الحليم
🔴 السلسلة التوثيقية خريف 2024م
🔴مدونة عتمور الإلكترونية السودانية
🔴الموقع الإلكتروني للدخول مباشرة
................اضغط هنا...............
👇👇👇👇👇👇👇👇👇👇
atmoorsudan.blogspot.com
✳✳✳✳✳✳✳✳✳✳
ليست هناك تعليقات:
إرسال تعليق