.....................بسم الله الرحمن الرحيم .....................
السلسلة التوثيقية - من ارشيف المدونة الالكتروني
مقتبس من الادب الشعبي في دار الرباطاب بالسودان
إعادة نشر: 1/5/2024م
—————————————————————
مقتبس من شعراء منطقة الرباطاب بالسودان
ذكر رموز و أعيان و المدن و الأماكن و مواطن الحسن و الجمال، في أدب الرباطاب الشعبي بالسودان.
ابراهيم عثمان سعيد-مدونة عتمور الالكترونية السودانية
—————————————————————
نماذج قصائد لشعراء من دار الرباطاب بالسودان1-17
—————————————————————
(1)
أشواقي لي بلدي الحبيبة ديمه العيون تفضحا
اشتقت للنيل و الضفاف و الجلسه في ضل الضحى
اشتقت لي بلدي الحنينه اشتقت قولة يمه يابه
حليل جلسة عشية العامرة بالناس الغلابه
—————————————————————
(2)
ماذيني انا يا رفيق
ظبيا سكن الشريق
......................
و ايضا:
شتيلة المشرق الفوق القيوف نديانا
و من بعدك حياة الكون على مسخانا
الشالو القطار ما اظن في يوم ينسانا
تبكيك الشريق عتمور عليك حزنانا
—————————————————————
(3)
يا عتمورنا أقولك بى أمانا
حبنا ليكي زي روحنا و جنانا
......................
و ايضا:
عصير المنقه و الانناس
عتمور نورت يا ناس
......................
و ايضا:
داير اشوف السوق الكبير و الدكاكين مضروبه جير
و حتى صالون الكوافير يبقى بي فوق الحفافير
......................
و ايضا:
شدر البرتكان مايل فريعو متنا
ميل بالثمار سلب العقل هجولنا
أديتكم أمانه و قلت عاد يا أهلنا
داير وكت أموت أرقد قصاد ود جنا
(القصاد مشهد ود جنا بعتمور ساقية جدي الكدب)
—————————————————————
(4)
أهل النيه يا بيضاء للنباري و السيال
حبيناكي يا مقرات من غريبا لى بربات
......................
مناي في قدله ان لقيتا من اللافاب لى كديته
......................
قلبا بالغرام محروق للسنده القصاد زروق
......................
و ايضا:
حليل الكان بضوي سمانا زولا سكنو السجانه
......................
و ايضا:
دي الهالكة البلد بي شوقا و مقرات تبكي لي زروقه
—————————————————————
(5)
يا ارتل هواكي ملاني لهيب الغربة جمرو شواني
وين ارتل نخيلا و نيلا مشتاق لى رمالا و ليلا
يا مولاي متين امشيلا أنسى الغربه و أنسى مقيلا
—————————————————————
(6)
من المسلمية طيبة راحت تدني
و السواق يقول لمتين اصل ود مدني
ود مدني جاتك يا عظيم يا سني
قول محفوظة عندنا ما بين الحفظ و الأمن
—————————————————————
(7)
حسن الظباء فات الغزال الأسمر
فتان الشمال الاهلو من ناس بربر
—————————————————————
(8)
ام درمان سلام
يا العاصمة يا الفيكي راحة روحي
كم ساهر ليالي و كم شفيتي جروحي
—————————————————————
(9)
ما قدرت القعاد مشتاق و نشفان دمي
سهران الليالي و ديمه زائد همي
حبك زاد على حب ناس أبوي و امي
و لى اجلك قمت قاصد البقعة افرج همي
—————————————————————
(10)
يا امدر اسرني جمالك الحور و الحسان اترابك
مالك روحي اصلو شبابك حي الموردة و عمرابك
—————————————————————
(11)
دويسة الفالق البرطن فروده
البشروط دوده بالشقين يحوده
تحت لى أم عقارب و فوق حدوده
أهل المملكة و العز جدوده
أبواتك تخوجل فوق عروضه
—————————————————————
(12)
ديكا أولاد عبيد ساكنين حدانا
أهل الحوبه في ساعة قسانا
......................
و ايضا:
أشوف نورك شلع فوق للسحابه
من عمرابه لى عبد الله يابه
......................
و ايضا:
تسيب جنة عبيد بلد الحواريات
و زي خيل السبق وكتين يجن واردات
عيونن ختت اب عشره البلا نقشات
رقابن صيد هويد فوق العدو شارفات
التعليم وصل و تتقطع العلات
و الثانوية بي فوق للسلوماب جات
......................
و ايضا:
نحنا عتامره نحنا كراقسه نحنا اماكا
نحنا أولاد عبيد و شمخة جبال التاكا
نحنا الملكه هيلنا و ما معانا شراكا
......................
و ايضا:
بدور شارع ظلط يربط قرانا
و الكاملين يكون في مستوانا
—————————————————————
(13)
طال بينا الغياب حلتنا يا حليلا
حبوب ود حسن قوماك عديلا
اوعا من العرق سارق و خد ميلا
......................
و ايضا:
كرقس يا مناظر يا جميله
و من زمنا قديم العزه هيله
فوق النيل صفوف شابك نخيله
و ما أحلى السمر ساعة مقيله
يغني القمري بي أصوات عسيله
كرقس سيدا فيها يقول حليله
—————————————————————
(14)
حرف الكاف دا متوسط حروفا
سعيد الدنيا يمشي "أمكي" و يطوفا
"أمكي" حنينة للأغراب ولوفا
و تضم الناس متال أما عطوفا
بريد أمكي و بريد نيلا و جروفا
......................
و ايضا:
يا سائق يلا عجل بينا
دموع الشوق جرحت عينينا
بعد دا الحال العودة لى امكينا
طريتا شكير يا حليل بينينا
—————————————————————
(15)
لولا الظروف حكمت علينا
يا الحبان ليكم ما نسينا
السلام يا أمن الامينا
لى اب سلم لى ناس الخزينا
......................
و ايضا:
رحمات الكريم تتوالى خير و احسان
فوق روح الزعيم المكى ود عتمان
داره تعج تفور مليانه بالضيفان
معروفه المزارع للكرم عنوان
—————————————————————
(16)
يا داخل ام غدي صلي على المختار
عينك بارده ما تكون حاسد او سحار
......................
و ايضا:
في وادي أم غدي الليله صاح البوم
خربانه العبوس الخاينه ما بتدوم
ارجعي يا نفس للواحد القيوم
ومهما الزول يكون راجيهو هذا اليوم
—————————————————————
(17)
يا الداخلة أم الشهيد الليلة جينا سلام
يا بلد الكفاح كم زعزعت حكام
atmoorsudan.blogspot.com
—————————————————————
—————————————————————
قصائد لم تكتمل ... و فرحة لم تتم
الشوق و الحنين في مرافئ الغربة
atmoorsudan.blogspot.com
( مقاطع من قصائد المرافئ 1 - 6 )
المنتدى العام
عن
مدونة عتمور عيال الوسطى
الأربعاء، 18 ديسمبر 2013
atmoorsudan.blogspot.com
(1) عتاب قلب:
خلاص يا قلبي اخترت تسيبه و تنسى ماضيه
و تنسى اللهفة و الأشواق تعيش في ظلمة ناسيه
حرام و الله تنساه و تنسى حنانه و أخلاقه
و تنسى الكان بعزك روح و تشهد ليك عويناته
و كل البينا كان هفوات تعود أيامنا تصفاله
atmoorsudan.blogspot.com
.......................
(2) زمان و الله:
زمان و الله بي يفرّق و لمّن يقسو يقسو شديد
و من بعدك حرام و الله لا بنعشق و لا بنريد
atmoorsudan.blogspot.com
.....................
(3) مظلومة:
مظلومة و عذاب الدنيا مكتوب ليك
صابرة وسارحة في دنياك و كل الناس تهاتي بيك
عزيزة و سمحة يا زينة و أمل دنيتنا كله عليك
حرام يا زينة تنظلمي و يبقى الحزن في خديك
ما إنتي الطيبة و الأخلاق و كل الناس بتشهد ليك
ما إنتي الريدة و الرقة و جمال بلدي المجسم فيك
صبرتي كتير على الحرمان و ياما الصبر بي يعزيك
كفاك عذاب ألم و أحزان و بكره الكون يزغرد ليك
وتعيشي الفرحة من تاني و أشوف البهجة في عينيك
atmoorsudan.blogspot.com
...........................
(4) تاجوج:
إنتي زي تاجوج حكاية و صورة في أجمل معاني
ما كفاية علي عيونك و شامه فوق خديك تلالي
atmoorsudan.blogspot.com
........................
(5) وداع كسلا التاكا:
كسلا التاكا فيها جمال رائعه بكل ما فيها
زينة و عظمة غرب القاش و سبحان ربي باريها
تجلت قدرة الرحمن في خدرة سواقيها
عشانك إنتي يا كسلا بحب الدنيا و الفيها
و بعشق للحلنقة هناك و للزول السكن فيها
و بشرب من مياه توتيل عشان أرجع و أعود ليها
زهرة جميلة ست الناس بسأل ربي يحميها
خلاص نقلوك جنوب الفونج و شلتي قلوبنا بالفيها
إيه معني الحياه بعدك و كيف نقدر نقاسيها
و مهما نظمت فيها قصيد محال بي شعري أوفيها
و يا رب عودة من تاني و أزور "كسلا" و ألاقيها
وداعا يا نبع توتيل كرم أدروب خريف تاكا و بواديها
وداعا ياجبل مكرام عُلا توتيل شموخ كسلا و روابيها
وداعا يا بديع كجراي حروف اسحق نغم ألحان شواديها
وداعا يا فراش القاش عطر فواح عصاريها و أماسيها
وداعا يا ديار تاجوج حكاوي الريد معاني الحب أغانيها
atmoorsudan.blogspot.com
......................
(6) مقرن النيلين:
(بيني و بين الشاعر الأردني زميلي الاستاذاحمد صالح العتوم - اجتمعنا في احدى مرافئ الغربة قبل سنوات -
" هذا ابن عثمان سن الجود أغنية "
هذا العتوم فاعط القوس باريها
" فإن الجود في السودان منبعه "
أنت الشريف ملك القوافي فمن يجاريها
و لولا الجود ما النيلين اقترنا
من للكنانة غير النيل ساقيها
بيني و بين تعاطي الشعر " أغنية"
جار الزمان و أيم الله ناسيها
أيا صاح جددت أياماً لنا سلفت
فمن لي بمقرن النيلين في الخرطوم "أغنيها"
atmoorsudan.blogspot.com
✳ ✳ ✳ ✳ ✳✳✳✳✳✳✳✳✳✳✳
🔴 🔴 🔴 🔴 🔴 🔴 🔴 🔴 🔴 🔴 🔴 🔴 🔴
د. ابراهيم عثمان سعيد عبد الحليم
الموقع الإلكتروني لمدونة عتمور الإلكترونية السودانية:
..........................................👇👇 ............................
...............atmoorsudan.blogspot.com.........................
🔴 🔴 🔴 🔴 🔴 🔴 🔴 🔴 🔴 🔴 🔴 🔴 🔴
✳ ✳ ✳ ✳ ✳✳✳✳✳✳✳✳✳✳✳
ليست هناك تعليقات:
إرسال تعليق