العبيداب... (((نحنا أولاد عبيد و شمخة جبال التاكه)))

العبيداب:

(((أشوف نورك شلع فوق السحابة

من عمرابه لى عبد الله يابه)))

(((نحنا أولاد عبيد و شمخة جبال التاكه)))

************************
ابراهيم عثمان سعيد عبد الحليم
12/7/2016 Muscat/Oman
atmoorsudan.blogspot.com
abdulhaleamibrahim@hotmail.com
العبيداب في ادب الرباطاب الشعبي بالسودان
أهلنا العبيداب بدار الرباطاب قال    فيهم شاعرالرباطاب مصطفى الحاج موسى :
ديك أولاد عبيد ساكنين حدانا
أهل الحوبة في ساعة قسانا
و يقول فيهم أهلنا العبيداب بدار الرباطاب أيضا:
أجاويد البلد في الدنيا مفهومين
و المشبوكه بي يحلوها بي ياسين
و قالت فيهم أهلنا العبيداب بدار الرباطاب
شاعرة عتمور المجيدة ست النفر بنت الحاج هذه الأبيات:
الليلة أنا بجر قافكم سمح عاجباني
جملة عيال عبيد ما فيكم الوراني
( ينظر" د. عبد الله علي ابراهيم، من أدب الرباطاب الشعبي، 1967م)
و عند افتتاح مدرسة العبيداب الثانوية العامة بدار الرباطاب
- مطلع السبعينيات - حيّاها الشاعر مصطفى الحاج بهذه الأبيات:
سمحه المدرسة المبنية دابه
ساسا متين كمان طاهر ترابه
من زمنا قديم زمن الصحابه
انتو أهل القلم و أهل الكتابة
أشوف نورك شلع فوق السحابة
من عمرابه لى عبد الله يابه
الذوق و الأدب شيبا و شبابه
و كملتوا الشجاعه قفلتوا بابه
مدرسة راقية قط ما بشوف نظيره
نرحب بالأساتذه بي مديره
في كل البلاد تصبح شهيره
و يجونا الطلبة من بلدان كتيره
بعد الثانوي تاني تكون كبيره
و تكون الجامعه بي قبل المغيره
نحمد ربنا النفض حياتنا
و شوف دي النعمه كيف جات لي بناتنا
و كل البي تجيك تجيك راطنا
و ما تعرف تكلم بي لغاتنا
بنتنا راقيه في الكليه دارسه
و انتي مأصله أجدادك عبابسه
ان بقى في القتال تلقاها فارسه
و داخل البرلمان تلقاها جالسه
**************************
و قال ايضا في قرى امكي و عتمور و العبيداب وكرقس مجتمعة :
نحنا عتامره نحنا كراقسه نحنا أماكه
نحنا أولاد عبيد و شمخة جبال التاكه
نحنا الملكه هيلنا و ما معانا شراكه
نحنا اذا غضبنا امريكا جاها هلاكه
( ينظر: ابراهيم عثمان سعيد عبد الحليم، من الأدب الشعبي في منطقة الرباطاب بالسودان، دراسة تحليلية، فبراير 1989م ، وatmoorsudan.blogspot.com).

و قال  فيهم  اهلنا العبيداب في دار الرباطاب بالسودان
 استاذالجيل  الشاعر الكبير / السر الماحي 
سيرتكم مضت سارت بها الركبان
اهل نجده ومروءه  وتنقذوا الدركان
محمودين خصال عفه ومعاها لسان
وبين الناس جميع امتزتوا بالاحسان 
نعم اولاد عبيد بين الخلايق شان
والتقى والصلاح هيلكم صفاء وايمان
 الجود والكرم من غير منازع دان
والبنكر فعالكم فى الحقيقه مدان
فى سوح العلم قاده ورموز واعيان
نورتوا الدياجى وماتركتوا مكان
فى يوم العبوس تتقدمو الفرسان
 تميلو من الطرب متل التقول عرسان
 فوق اولاد عبيد يالسانى جيب اوزان
  وانظم للقصيد شكرا سمح مليان
ديل سم العقود البقطع المصران
و ديل تاية الضعيف والبائس العريان
داركم عامره ديمه وقبله للضيفان
وجبارين خواطر تكرموا العشمان 
الزول الضعيف والغاشى والعدمان
يضحك ويتبسط يرضى ويقوم فرحان
يوم فرز الصفوف والناس تقيف كيمان
كوم اولاد عبيد انا عندى فيه مكان
ديل قمر الليالى البيض ملجلج بان
يهدو السالكين ويتقلو الميزان
( ينظر : منحنى النيل الثقافي ٨/١١/٢٠١٦ )

abdulhaleamibrahim@hotmail.com

مدونة عتمور عيال الوسطى في دار الرباطاب بالسودان
ابراهيم عثمان سعيد عبد الحليم مدوناتي الخاصة: مقالات، بحوث، مذكرات، تجربة حياة، آراء،وأفكار . بوابة تواصل مع أهلي وعشيرتي ومعارفي في عتمور وفي دار الرباطاب خاصة ...
ATMOORSUDAN.BLOGSPOT.COM|من IBRAHIM ABDULHALEAM