بسم الله الرحمن الرحيم
مدونة عتمور الإلكترونية السودانية التوثيقية الشاملة
السلسلة التوثيقية: من أدب الرباطاب الشعبي بالسودان
نموذج من شعر المدح: قصيدة منتخب عتمور "الأمل"
شاعر الرباطاب الكبير أستاذ الأجيال / السر الماحي
أمل عتمور أملنا علي الدوام متجدد
عارفاه الشباك لمان يصول و يسدد
عارف المرمى ما بيخشاه مو متردد
و الحراس تهابه تخافه لما يهدد
نحن بساله نحن جساره نحن حميه جوفا حار
و نحن اسود عرين مرين و ناكل النار
عشان خاطر عيون عتمور نثور اعصار
نحن اقمار دياجى و سيف سنين بتار
املنا صلابه قوه شباب فتوه عزيمه
ما بيخشى التنافس و الملاعب و ليمه
معروف بين ندايده املنا معنى وقيمه
و عنده مع المنصات رغبه عايشه مقيمه
املنا على الدوام ملء السمع و الشوف
عنده اراده صلبه حديد و حرة جوف
املنا جسارته فايته و مابيعرف الخوف
دايما فى المفاصل كيوه مو فوق دوف
فى الميدان بتمتع لما تبدأ فنونك
و كل فريق بيصغر و يبدو اقل و دونك
ملك الساحه تبقى براك و مافى بدونك
تسعد للحضور و املنا الله يصونك
اللعب الجماعى الواعى معروف هيلك
وفي الميدان حضورك روعه مافى مثيلك
وافى سخي و تجود ماخد طبائع نيلك
و شكرنا غير حدود للكوتش ياهو دليلك
نحن منو البسطر زينا الميدان
و يرسم فيه اشكال هندسه و الوان
في اللعب النضيف تيم الامل عنوان
و يبهج كل زول و يبدد الاحزان
حادينا الامل و احلامنا بكره الكاس
و عتمور تستحق شان فيها اعز الناس
فيها فريق مكمل وافى كله حماس
و عنده مشجعين باقين قياده و راس
عتمور فى قفاك حشدت شبابه و شيبه
هتفت ليك صراحه بدون نفاق او ريبه
راجيه الانتصار والكاس ضروري تجيبه
شان الفرحه تنزل فوقا تبقى نصيبه
الكاس يا شباب حتما لزام و فريضه
و نحن امالنا فيكم بصراحه عريضه
شدوها الهمم وانفوا الدواخله مريضه
ونحن هممنا غير الكاس محال تعويضه
دفاعك ما بيهادن و عينه بالمرصاد
و كل الشاف صلابته انتر و قبل صاد
النص فيك محكم و خاصه في الامداد
و كان قلنا الهجوم قناص فرص صياد
شاعر الرباطاب أستاذ الأجيال/تاج السر الماحي الطاهر
atmoorsudan.blogspot.com
ليست هناك تعليقات:
إرسال تعليق