....................بسم الله الرحمن الرحيم.................
مدونة عتمور الإلكترونية السودانية
عتمور محلية أبو حمد - ولاية نهر النيل السودان
—————————————-
تعزية و مواساة في ذمة الله
حسن محمد أحمد سمساعة أيوب (حسن دنقلا)
—————————————-
بمزيد من الحزن والأسى و عبر مدونة عتمور الإلكترونية السودانية نتقدم بأحر التعازي و المواساة و نعزي أنفسنا و إياكم في وفاة طيب الذكر المغفور له باذن الله:
حسن محمد أحمد سمساعة أيوب (حسن دنقلا)
و الذي حدثت وفاته بكسلا إثر علة مرضية لم تمهله طويلاً يوم السبت 23 نوفمبر 2024م.الموافق 21 من جمادى1 1446 هجرية.
فالراحل المقيم / حسن دنقلا ولد في العبيداب بدار الرباطاب بمحلية أبو حمد بولاية نهر النيل بالسودان.
و أدى المرحوم حسن دنقلا ضريبة الوطن جنديا في القوات المسلحة السودانية في سلاح الإشارة في عام 1957م و كان يسكن بأمدرمان بالسودان .
و عمل المرحوم حسن دنقلا في العديد من مدن السودان آنذاك : مدني، القضارف، كسلا، مريدي، يامبيو، أنزارا ، و توريت.
و عمل خارج السودان في اليمن حوالي العامين و نصف. و عاد للسودان فعمل بمصنع النسيج السوداني ببحري.
و أعيد للخدمة العسكرية في القوات المسلحة السودانية في سلاح الإشارة حتى المعاش في عام 1974م.
و ارتحل المرحوم حسن دنقلا باكراً من دار الرباطاب في شمالي السودان للعمل بالقوات المسلحة السودانية، و قضى جزءا من حياته بام درمان. و أخيرا طاب له المقام في شرقي السودان.فاختار كسلا ابنة القاش مسكناً و داراً و مقاماً، فاحتضنته كسلا التاكا مقر إقامته و قضى بقية حياته فيها حتى رحيله عن هذه الدنيا الفانية.
و كان آخر لقاء لنا مع الراحل حسن دنقلا عبارة عن سلسلة محادثات متصلة تمت بترتيب و لعدة ايّام عبر الواتساب و عبر الهاتف من مقر إقامته في كسلا عندما كنت مقيماً وقتذاك في ام درمان بالسودان عام 2022م؛ و ذلك بغرض التوثيق لسيرته الذاتية و نشرها في السلسلة التوثيقية بمدونة عتمور الإلكترونية السودانية؛ باعتباره شخصية من شخصيات دار الرباطاب العامة، و كواحد من شعراء الأدب الشعبي في دار الرباطاب بالسودان .
و تم التوثيق و النشر و لله الحمد و الشكر، لسيرته العطرة، في هذه المدونة الإلكترونية السودانية و على صفحتنا للفيسبوك. و تمت إعادة النشر بعد هذه المقابلة و المحادثات الصوتية على نفس الصفحات الإلكترونية آنفة الذكر يوم الجمعة بتاريخ 17 من يونيو في عام 2022م.
اللهم أكرم نزله و وسع مدخله و تقبله قبولا حسنا.
اللهم ادخله جنة الرضوان .
اللهم اجزه بالحسنات احسانا و اغفر له و ارحمه يا أرحم الراحمين.
اللهم أبدله دارا خيرا من داره و أهلا خيرا من أهله.
اللهم اجعل البركة في ذريته.
اللهم الزم ذويه الصبر و السلوان و حسن العزاء .
و تعازينا موصولة إلى:
أسرته الكريمة و أبنائه و بناته و نسابته و أصهاره.
و إلى عموم :
ال المرحوم والده/ محمد أحمد سمساعه أيوب و ال المرحومة والدته/ الشاعرة ست النفر بت الحاج أيوب. و ال المرحوم حسن دنقلا و إلى أبناء و بنات أخوانه و أخواته.
و تعازينا موصولة إلى:
عموم الأهل بدار الرباطاب بالسودان. و في العبيداب و عتمور و ام غدي و البابية و أبو حمد و مقرات و عطبرة و خليوه و الدامر و الخرطوم و ام درمان و بحري و كسلا و بورتسودان .
و إلى أهل المرحوم حسن محمد أحمد سمساعة أيوب(حسن دنقلا) و جيرانه و أقاربه و معارفه و زملائه في داخل و خارج السودان.
و لا حول و لا قوة الا بالله العلي العظيم
وانا لله و انا إليه راجعون
د. ابراهيم عثمان سعيد عبد الحليم
مدونة عتمور الإلكترونية السودانية
مدونة عتمور عيال الوسطى في دار الرباطاب بالسودان
✳✳✳✳✳✳✳✳✳✳✳
الموقع الإلكتروني لمدونة عتمور الإلكترونية السودانية:
..........................................👇👇 ............................
...............atmoorsudan.blogspot.com.......................
✳✳✳✳✳✳✳✳✳✳✳
—————————————-
🔴 🔴 🔴 🔴 🔴 🔴 🔴 🔴 🔴
✳✳✳✳✳✳✳✳✳✳✳
—————————————
........بسم الله الرحمن الرحيم......
السلسلة التوثيقية - من ارشيف المدونة الالكتروني
🔴إعادة النشر اليوم الجمعة 17/6/2022 - ام درمان/السودان
atmoorsudan.blogspot.com
شخصيات من دار الرباطاب في السودان
شخصيات من العبيداب بدار الرباطاب السودان (11)
الشاعر/حسن محمد احمد سمساعة ايوب ( حسن دنقلا )
- أمد الله في عمره و أيامه
- و متعه الله بموفور الصحة و العافية
الشاعر حسن دنقلا :
شاعر الفراق و الدموع
مكان الإقامة الدائمة: كسلا - شرق السودان
من أبناء العبيداب
دار الرباطاب / محلية أبوحمد
ولاية نهر النيل / الإقليم الشمالي / السودان
atmoorsudan.blogspot.com
الشاعر حسن دنقلا :
أمد الله في عمره و أيامه ...
و متعه الله بموفور الصحة و العافية :
فهو سليل الأدب و الشعر في دار الرباطاب بالسودان ...
و وريث الشعر و الأدب الشعبي في منطقة الرباطاب بالسودان ...
شعره:
سهل ممتنع ...
فهو شاعر رزين ...
و رصين الكلمه ...
فشعره ايضا:
سلس و رقيق العبارة ...
فالشاعر حسن دنقلا:
مفطوم بالشعر و القصيدة ...
فالشاعر حسن ود دنقلا ابن الشاعرة المجيدة ست النفر بنت الحاج أيوب و يحلو لاهله بام قحف بالعبيداب بدار الرباطاب بتسميته حسن ود ست النفر كعادتهم بنسبة الابن لامه و لشهرة الشاعرة ست النفر بت الحاج أيوب.و لاحظت ان هذا التقليد نجده متبعا في بعض مناطق الرباطاب و ايضا سائدا بين الأسر الامدرمانية من اهلنا الرباطاب الذين استقروا في ام درمان.
و ست النفر بت الحاج أيوب من شاعرات العبيداب و عتمور المجيدات و خاصة في مجال شعر السومار فقالت في مناسبة زواج ابنها أبو كرار عبد الباسط( الشيخ/ عبدو ود اب ضكلوم) :
لى عبدو الخلافة الليلة مبروكه
وسيرتك بالشباب وبارياها دلوكه
دا الفايدتو مو دابو الجنا الروكه
إن جلسوا الرجال يفتوا ويشوروكه
وخليفة الساده للحضرات بريدوكه
فقالت ايضا في شكر أهلها العبيداب بدار الرباطاب:
الليله أنا بجر قافكم سمح عاجباني
جملة عيال عبيد ما فيكم الوراني
و خال الشاعر حسن دنقلا الشاعر الحسين ود الحاج أيوب، خليفة السادة الميرغنية / الختمية في عتمور بدار الرباطاب فهو من شعراء عتمور المجيدين...
ومن أشعاره :
مولاى في فضلك عشامه
وبعد الحاله أشوف جدي التمامه
ثم يردف هذه القصيدة بأخرى مشهورة ، يذكر فيها كل الحروف الهجائية:
بي الألف أول البنوت تجيك عجيبه
بي الباء براهو تعرف قلتو و ترتيبه
ثم يسرد الشاعر الحسين ود الحاج أيوب- من عتمور بدار الرباطاب بالسودان - قصة سفره إلى كسلا و كان ان كلفه صديقه الشاعر عبد الحفيظ محمد أحمد كمرسال لموافاته بأخبار تلك المحبوبه ، عبر هذه الأبيات للشاعر عبد الحفيظ محمد أحمد:( ينظر، د.عبد الله علي ابراهيم ، من أدب الرباطاب الشعبي، وموقع قوقل انترنت).
يا مرسالي قوم لى زولي قولو
كفاك الشفتو زي ما تقولو قولو
قولو الروح معاك بلا الجتة ايش فضلو
قولو قيد القدرة في رجلو انطبلو
قولو نشفان ريقو ما قادر يبلو
قولو أدوهو المويه قال لي شن أكلو
قولو اكسير ام عقارب قلعو كلو
و نبت عود الخراب قام في محلو
و البوم و الغراب قيل في ضلو
إلى أن يقول الشاعر عبد الحفيظ للمرسال:
حسين الحاج شوف لي سبعين ايش حصلو
إن بقى غادي للسهني تصلو
و إن بقى فوق سرير النوم تدخلو
قدر ما يتعضرلك لا تقبلو
و مخسم بالله أوعك لا تخلو
و إن ما جبتو ما تجي كلو كلو
و بعد ان عاد الشاعر الحسين ود الحاج أيوب من كسلا و معه البشارة باخبار مواعيد عودة تلك المحبوبه للبلد قال الشاعر عبد الحفيظ محمد أحمد:
البشارة قال لي يوم الجمعة ادلو
البلد الخير و النعيم دابو راح يطلو
و بعد أن عادت هذه المحبوبة للبلد قال الشاعر عبد الحفيظ محمد أحمد في وصفها:
دويسة الفالق البرطن فروده
البشروط دوده بالشقين يحوده
تحت لى أم عقارب و فوق حدوده
أهل المملكة و العز جدوده
أبواتك تخوجل فوق عروضه
و لابد لنا من الإشارة في هذا المقام الى ان الشاعر عبد الحفيظ محمد أحمد قضى جزءا من حياته الاولى في منطقة العبيداب بدار الرباطاب.
و نشير ايضا الى ان هذه هي البيئة و المنطقة و المحيط و الوسط الشعري الذي ولد و نشأ فيه الشاعر حسن دنقلا بدار الرباطاب بالسودان.
و اما الشاعر حسن دنقلا:
فهو شاعر مسكون بالإبداع ...
فولد ليكون شاعرا غريدا ...
و الشاعر حسن دنقلا ولد في العبيداب بدار الرباطاب بمحلية ابو حمد بولاية نهر النيل.
و أدى ضريبة الوطن جنديا في القوات المسلحة السودانية في سلاح الإشارة في عام 1957م و كان يسكن بأمدرمان بالسودان ... و عمل في العديد من مدن السودان:مدني، القضارف، كسلا، مريدي، يامبيو، أنزارا ، و توريت. و عمل خارج السودان في اليمن حوالي العامين و نصف و عاد للسودان فعمل بمصنع النسيج السوداني ببحري.و أعيد للخدمة في القوات المسلحة السودانية في سلاح الإشارة حتى المعاش في عام 1974م.( مصدر المعلومات محادثه معي عبر الهاتف من كسلا ).
و هاجر باكرا من دار الرباطاب في شمالي السودان...
فطاب له المقام في شرقي السودان...
فاختار كسلا ابنة القاش مسكنا و دارا و مقاما...
فاحتضنته و استهوته كسلا التاكا مقر إقامته الحالية ...
فنثر بديع شعره ودرر قصيده في مواطن الحسن و الجمال على ربى جبال التاكا و جبل توتيل و جبل مكرام و جبل تكروف و على سواقي كسلا و القاش و على سحر جمال تاجوج و على كرم أدروب في ربوع الشرق الحبيب...
فكسلا الخضراء أسرت بجمالها الكثير من الشعراء فوصفها الشاعر توفيق صالح جبريل بجنة الإشراق:
كسلا أشرقت بها شمس وجدي فهي في الحق جنة الإشراق
و قال عنها ابن كسلا الشاعر و رئيس جمهورية الحب إسحاق الحلنقي:
يا حليل كسلا الوريفه الشاربه من الطيبة ديمه
كم أسر فنان جمالا و خلى قلبو عليها غيمه
و عاود الشوق و الحنين احد الشعراء من ابناء كسلا فقال هذه الابيات في مدينته كسلا :
هلا يا هلا .......... وين كسلا
بدور أصلا ......... أزور جبلا
أقابل أهلا .........أضوق عسلا
وين في كسلا
هلا يا هلا
جبل توتيل .........
عظيم وجميل
شموخ وعلا
وين في كسلا
هلا يا هلا
جمال تاجوج .........
كرم أدروب يزيدا حلا
وين في كسلا
هلا يا هلا
مناي أشوف جبل تكروف .........
مراغنة هناك زيارة صفوف
وين في كسلا
هلا يا هلا
بساهر الليل .........
وأخاصم النيل
وأزور توتيل
وين في كسلا
هلا يا هلا
بطير بي فوق .........
وأشوف السوق
وأسوي القوق
وين في كسلا
هلا يا هلا
هنيئا لكسلا التاكا بهذا الشاعر الغرّيد حسن دنقلا فهو ايضا من العاشقين لكسلا و من المؤكد فله العديد من القصائد الغير منشورة في وصف جمال كسلا فلم تصلنا بعد...
🔴 و اما فنحن ابناء عتمور و العبيداب بدار الرباطاب
فعرفنا من خلال أشعار حسن دنقلا :
ساقية حنين و بدير ... و مرابع اخرى بدار الرباطاب.
🔴 🔴 و طربنا:
-🔴 للرائق زمانك ضائع ...
و ما شفت الجمال الرائع
-🔴 و أنا ما شفتو بس حكى لي طه ...
-🔴 و حكم الفي الدموع غرقان ...
و الليهو الوصول صعبان
-🔴 وين يا ناير الأوجان...
يا الساده و جميل فتان
-🔴 و فراق الشيخ دا لو سمعو ...
لكان بلا القميص دمـعـو
-🔴 و صيدا في سكونو غروب ...
و اتجننت يا حبوب
-🔴 حبوب ود حسن قوماكا عديبا ...
و أوعا من العرق سارق و خد ميلا
-🔴 و هايل ذوقك الحساس
اشوفك و انبسط يا ناس
-🔴 و سليم قال ليا ما مسرور ...
و قال حلتنا فاقده النور
أقول يا يابا ود منصور
أقول يا شيخنا ود حاج نور
و ترجع ما تتم الدور
و يوم اتنين يقولوا حضور
-🔴 ما بنساهو زولي الاول ...
الساكن فؤادي انا طول
كيف انساهو و أنسى زمانو
دا الزول المعظم شانو
هذا: فالشاعر حسن دنقلا ورد ذكره كواحد من شعراء الأدب الشعبي في دار الرباطاب بالسودان ( الشعر الغنائي ) ...
فتغنى له الفنان الراحل المقيم/ عبد الدائم حاج عيسى - من فناني منطقة كرقس بدار الرباطاب - بعدد من الأغنيات و منها على سبيل المثال:
قام ضلم علينا الحي
حليل الودعوا يا خي
بغني و لي دياري فراق
و لى شوفتو العيون تشتاق
بقوقي و طالت الأشواق
صحيح يا اخواني يا عشاق
و الله الزمان فراق
حليل الهادي في طبعو
و ميل بالثمار فرعو
و بدل حرسو بي منعو
فراق الشيخ دا لو سمعو
لكان بلا القميص دمـعـو
- و سليم قال ليا ما مسرور
و قال حلتنا فاقده النور
أقول يا يابا ود منصور
أقول يا شيخنا ود حاج نور
و ترجع ما تتم الدور
و يوم اتنين يقولوا حضور
إلى ان يقول:
ما شفت الدمع كيف سال
دا أسبابو الفراق الطال
يا مولاي بعد دا الحال
تمرق سيرة باستقبال
و امرح و اخد الشبال
🔴 فشعر الشاعر حسن دنقلا جدير بالبحث و الدراسة و النشر على أوسع نطاق ...
🔴 فالشاعر حسن دنقلا جدير بالاحتفاء و التكريم.
🔴 فعذرا فنحن لا نعرف كيف نحتفي بالمبدعين في بلادنا !؟
فتحية إجلال و تقدير للأديب الشاعر و ابن العبيداب في دارالرباطاب بالسودان حسن دنقلا.
هذا فليت الشاعر المجيد حسن دنقلا يعود يوما لتلك الديار الحبيبه في عتمور و العبيداب بدار الرباطاب لينثر الفرح على ربوعها من جديد ...
( نقلا و اقتباسا عن: إبراهيم عثمان سعيد عبد الحليم ، من الأدب الشعبي في منطقة الرباطاب بالسودان، حي العرب ، ام درمان ، السودان، فبراير 1989م) .
———————————————————
د. ابراهيم عثمان سعيد عبد الحليم
مدونة عتمور عيال الوسطى في دار الرباطاب بالسودان
atmoorsudan.blogspot.com
———————————————————
الصورة:
حسن دنقلا ... شاعر الفراق و الدموع ...........
من ابناء العبيداب بدار الرباطاب بمحلية ابو حمد بولاية نهر النيل بالاقليم الشمالي بالسودان.
متعه الله بموفور الصحة و العافية و امد الله في عمره و ايامه فهو مقيم حاليا في شرقي السودان بمدينة كسلا الخضراء
🔴إعادة النشر اليوم الجمعة 17/6/2022 - ام درمان/السودان
atmoorsudan.blogspot.com
................................
ليست هناك تعليقات:
إرسال تعليق